Mizoram Lockdown (inkharkhip) Ni 130

Real Madrid midfielder Toni Kroos-a'n hriat a hlawhna tak chu Bayern Munich a ni a, Spain lam pana puanthuah a tel hmain Bayern tan hian league match 130-a khelhsak hman a, goal 13-a khung. 

Bayern academy aṭanga inzir chhuak Kroos hian 2007-08 season khan kum 17 mi lek niin senior team tan a khel tawh a, a season hmasa berah hian inelna hrang hrangah match 20 a khelhsak. Hetihlai hian Bayern B team tan German fourth division lamah a khel bawk a, match 12 khelin goal thum a khung. Bayern hian Bayer Leverkusen lamah thla 18 chhung loan-a khel turin kum January 2009 khan an kaltir. 

Leverkusen tan hming a chher hnuah Bayern lamah a kir leh a, 2013-14 season thleng khelin inelna hrang hrangah match 205-a khel hman a, goal 25-a khung. Bayern tan hian Bundesliga (3), DFB-Pokal (2), DFL Super Cup (1), Champions League (1), UEFA Super Cup (1) leh FIFA Club World Cup (1)-ah a champion. 

Kum 2014-ah Real a pan a, vawiin thlengin inelna hrang hrangah match 277 khelhsakin goal 19-a khung. Spanish club tan hian La Liga (2), Spanish Super Cup (2), Champions League (3), UEFA Super Cup (2) leh FIFA Club World Cup (4) nomawi a chawi tawh. Germany tan vawi 96 inlan tawhin goal 17-a khung a, World Cup 2014-a champion team zingah a tel. UEFA Champions League Squad of the Season-ah vawi nga a lang a, Bundesliga Team of the Season-ah vawi thum a lang a, La Liga Team of the Season-ah vawi hnih a lang bawk.