I League en tur a awm leh ta ; Aizawl FC Vs Churchill Brothers
Vawiin tlai dar 2:00 hian Rajiv Gandhi Stadium, Aizawlah I League champion lai Aizawl FC-in Goan club Churchill Brothers an mikhual dawn.
Mizo club hian I League-ah match khat chauh an la khelh avangin point khat hmuin table-ah pasarihnaah an awm mek a, nomawi humhim tura pressure an neih tlem theih nan point la hmu lo awm chhun Churchill an hneh hi a pawimawh ang.
Ticket leh Red Army
I League inkhel en man hi Rs 200 leh Rs 100 a ni a, hralh zawh a la ni lo. Inkhel en tum tan RG Stadium kalkawngah lei mai turin a awm ang.
Aizawl FC ṭantu Red Army pawhin Mizoram Premier League final-a an flag siam te an ring chhunzawm thei ang a, I League ṭan niah eng ang chiaha inpeih nge an nih tih chu a takin a lang ang.
A harsa dawn
Tun season-ah India ram football kalphung thlak hret a ni a, I League leh Indian Super League te chu a ruala khelhtir niin player pakhatin club pakhat bak a nei thei tawh lo. Hei hian fixture chungchangah pawh nghawng nei nghalin I League khelh hun chu sawn hma a ni a, MPL tawp lam boruak sang nen a in nan fuh tak avangin Aizawl FC hmabak a harsa sawt ang.
I League club hian Paulo Meneses hoin MPL nomawi chawi ngei tum mah se final-ah Chhinga Veng an hneh lo. MPL-ah Romanian midfielder Andrei Inonescu chu a inhliam a, PSV Eindhoven aṭanga inzir chhuak midfielder hi MPL knockout stage china a inlan theih loh bakah East Bengal an hmachhawn ṭumin a khel lo a, tun ṭumah pawh a inlan theih loh tur thu Aizawl FC coach chuan a sawi.
Inhliam vanga hun rei tak khel tawh lo S. Malsawmtluanga'n training zawm leh tawh mah se inlan nghal tur khawpin ngai a la awh lo a, Jonathan Lalrawngbawla'n substitute aṭangin MPL final a khel leh tawh. Hetihlai hian rawlthar winger duhawm Rochharzela chu inhliam vangin squad-ah a la awm lo ang.
Aizawl FC coach Paulo Meneses chuan, "Inhliam kan la neih avangin kan ṭhat dan berin kan inlan thei dawn lo. Hei bakah hian training-na tur kan nei ṭha tawk lo," tiin a sawi.
An inthuam ṭha
Aizawl FC hian inthuam ṭhat nan MPL club dang an dawr a, Chhinga Veng FC aṭangin MPL6 best defender R. Laldinliana an lalut tawh. Season ṭan hmaa an biak fel tawh V. Lalchhuanawma chu Ramhlun North aṭangin an la fel tawh bawk.
Portuguese coach Paulo Meneses chuan, "Kan club khelh dan an hriat chian phawt a ngaih avangin starting eleven-a awm tur chuan training tam an la mamawh a, player awm sate nen khelhna hmun an inchuh ang," tiin an player tharte Churchill Brothers nen an inkhelh huna chhawr a tum loh thu Vanglaini a hrilh.
I League dan tharah foreigner paruk a neih theih tawh a, Aizawl FC pawhin East Bengal an hmachhawn ṭumin MPL-a inlan lo midfielder Alfred Kemah Jaryan, defender Kareem Omolaja Nurain, winger Zikahi Leonce Dodoz leh striker Yugo Kobayashi te an chhawr vek a, Afghan defender Masih Saighani a awm tel bawk.
Mizo panga MPL best forward H. Lalmuankima, David Lalrinmuana, William Lalnunfela, Lalrinzuala Khiangte leh Lalramhmunmawia ten bul an ṭan bawk a, Churchill Brothers nen pawh hian starting eleven a danglam a rinawm lo a, MPL-a chhawr rim ber goalkeeper-ah Avilash Paul a inlan ang.
Portuguese coach Paulo chuan, "MPL final-a kan chak loh hnuah kan thawh chhuah a ṭul. Inrintawkna kan neih leh nan te, kan fan-ten min rin nante leh nomawi humhim turin kan ṭha tawk tih hriat nan Churchill lakah hian ṭha taka kan khelh a ṭul a ni," tiin point thum hmuh ngei a tum thu Vanglaini a hrilh.
Churchill nen chuan
Aizawl FC hian season liam ta khan Goan club Churchill hi ṭum hnih hmachhawnin 3-1 ve vein an hneh a, RG Stadium-ah tun season-a Mohun Bagan tana khel Ghanefo Ansumana Kromah hmanga hma an hruai hmasak avangin Mizo club an talbuai a, second half-ah goal thumin chhang let mah se an chak awlsam lo.
Goa-a an intum ṭumin Aizawl FC-in Bayi Kamo Stephane hmangin goal hnih an khung hmasa a, amaherawhchu Churchill lamin goal khat an rawn neih hnuah Mizo club an talbuai leh a, minute 85-naa R. Laldanmawia goal-in dinhmun ṭhaah a dah chauh. Tun ṭumah hian AFC-in Churchilll lama goal khungtu Lalramchullova, Kamo leh Danmawia te an nei tawh lo.
Aizawl FC ang thoin Churchill pawh team dang daih an ni tawh a, season bul an ṭan dan aṭanga thlir chuan team
ṭha an ni lo. Goan club hian an match hmasa bera Shillong Lajong 0-2 a an hneh loh hnuin Mohun Bagan lakah 0-5 in an tlawm zui a, goal an la khung loh bakah goal sarih an chhuah tawh. Goan club tana chanchin ṭha erawh inhliam an nei lo a, coach Alfred Fernandes-a'n a duh angin player a rem thei ang.
Tlar hmaah Nigerian forward Eric Obinna chu an hmachhuan tur a ni dawn a, a hnampui Peter Oghenebrorhien-a'n midfield aṭangin a chawm ang. Tlar hnungah Singaporean Emuejeraye Precious leh Nigerian defender Osagie Monday te an kawl a, I League-a tawnhriat nei tawh Alber Gonsalves, Banpynkhrawnam Nongkhlaw, Israil Gurung leh Uttam Rai te an kawl avangin Mizo club tan point hloh theihna tur a ni.
Mipui mamawh AFC
Aizawl FC captain Alfred Kemah Jaryan hi season hmasaa nomawi an chawina kawnga fans pawimawh zia hrechiang bertu zinga mi a ni. Liberian midfielder chuan Vanglaini zawhna chhangin, "Kan champion season-ah khan fan-ten min ṭawiawm ṭha em em a, I League nomawi kan chawina kawnga min puitu an nih zia chu a hrechiang bertu zinga mi ka ni. MPL-ah chuan Chhinga Veng, Chanmari leh club dang Mizo mipui ten an ṭan a ni mai thei, mah se I League a nih chuan Mizo leh he ram tan hian kan khel a ni tih an hria a, min ṭawiawm ṭha em em zel a ni," tiin vawiinah pawh Mizo mipui puihna an mamawh thu a sawi.
Mizo club coach Paul Meneses chuan, "MPL-ah kan khelh dan in hre tawh a, hnehna chang turin kan khel ang. Indian champion kan ni a, champion-in a khelh dan tur diktaka khel chungin champion leh kan tum dawn a ni. I League club kan ni mai lo a, Mizo tana khel kan ni. Nomawi chawi turin mipui puihna pawh kan mamawh ang," a ti a, Mizo mipuite Mualpuia inkhel en turin a sawm.
Churchill Brothers coach Alfred Fernandes chuan, "Sulhnu thlirin AFC lakah hian result kan nei ṭha lo a ni mai thei a, mah se tun ṭum chu hnehna chan ngei tumin kan lo kal a, thil thar tawng turin kan inbuatsaih a ni," tiin Vanglaini zawhna a chhang.
Sikkimese rawlthar duhawm Uttam Rai chuan, "Hliam vangin duhthusamin season hmasa ka hmang lo a, tun season erawh Churchill tan ṭha taka khelh ka tum," tiin AFC laka a theihna pholan a tum thu a sawi ve bawk.
AFC kulhpui RG Stadium
Aizawl FC-in season liam ta khan I League champion ni turin point 37 an hlawh chhuak a, nomawi an chawi theihna chhan hi RG Stadium, Mualpuia result an neih ṭhat vang a ni. Mizo club hian Mizorama match kua an khel a, Mualpuia point hmu thei awm chhun chu Bengaluru FC chiah an ni - an inhnehtawk.
Mikhual team ten RG Stadium chu a awmna hmun a san (high altitude) avangin khelh a harsat thu an sawi ṭhin a, amaherawhchu hei chauh hi I League club dangte tana khelh a harsatna chhan a ni lo. Mizo mipuiin I League-a Mizo club awm chhun Aizawl FC an ṭan rawn a, ṭantu an nei ṭha, hei vang hian mikhual player-ten an duh angin an khel thei lo a, AFC player-te tan erawh phurna siamtu a ni thung.
Tun season-ah pawh Aizawl FC hi champion lai ni mah se player neih dan leh sum hman dan aṭanga tehin champion nawn a harsa dawn tih a lang nghal a, India ram champion ni leh tur chuan mipui
ṭawiawmna bawk a pawimawh ang.
Season liam taa an inkhelhna thlirletin Aizawl FC-in harsa takin point an sual chhuak a, si hnih faia an chaknaah pawh goal an khung hun chu second half a ni a, Mizo club tan point hmuh a awlsam dawn lo tih mipuite pawhin an hriat lawk a ṭul ang.
Season liam ta RG Stadium-a
AFC result thlirletna
ROUND 2 - JANUARY 13, ZIRTAWPNI
Aizawl FC 1 - 0 Minerva Punjab
AFC : Loveday Okechukwu 90+4' (OG)
ROUND 3 - JANUARY 17, THAWHLEHNI
Aizawl FC 2 - 1 Shillong Lajong
AFC : Jayesh Rane 64'; Lalruatthara 32'
SLFC : Yuta Kinowaki 85'
ROUND 6 - FEBRUARY 1, NILAINI
Aizawl FC 1 - 0 DSK Shivajians
AFC : Brandon Vanlalremdika 89'
ROUND 8 - FEBRUARY 10, ZIRTAWPNI
Aizawl FC 3 - 1 Churchill Brothers
AFC : Lalramchullova 62'; Bayi Kamo Stephane 69';
Banpynkhrawnam Nongkhlaw 77 (OG)
CB : Ghanefo Ansumana Kromah 33'
ROUND 9 - FEBRUARY 15, NILAINI
Aizawl FC 1 - 1 Bengaluru FC
AFC : Brandon Vanlalremdika 40'
BFC : Sunil Chhetri 45'
ROUND 10 - FEBRUARY 20, THAWHTANNI
Aizawl FC 1 - 0 East Bengal
AFC : R. Laldanmawia 58'
ROUND 11 - FEBRUARY 25, INRINNI
Aizawl FC 1 - 0 Chennai City
AFC : Brandon Vanlalremdika 53'
ROUND 12 - MARCH 4, INRINNI
Aizawl FC 2 - 0 Mumbai FC
AFC : Bayi Kamo Stephane 65', 78'
ROUND 17 - APRIL 22, INRINNI
Aizawl FC 1 - 0 Mohun Bagan
AFC : Zohmingliana Ralte 83'