Hart leh Adrian vanga buai lo Moyes

West Ham United manager David Moyes chuan goalkeeper khel tur thlan chungchangah Joe Hart awltira Adrian a khelhtir chu thutlukna harsa a nih loh thu a sawi.

Hart hian England tana inlan phak zel a duh vangin season hmasa khan Manchester City tan a khelh phak loh avangin Serie A lamah a kal a, tun season-ah a inkhelh tam theihna tura ngaih West Ham chu a zawm.

Team talbuai West Ham-in Moyes an lakluh hnuah danglamna thlen an duh a, Hart aiin Adrian a thlang, Chelsea an hneh ṭum pawhin Adrian hi inkhel bul ṭantu a ni.

Moyes chuan, "Player pahnih ten an theihtawp an chhuah a, a pawimawh ber zawk chu tunge khel tih aiin West Ham-in hnehna an chan theihna tur kha a ni," tiin a sawi.

Hammers hian zanin dar 1:30 hian league match khel turin Arsenal an mikhual dawn, Gunners hi Southampton lama chak zo lo an nih laiin West Ham erawh Blues hneh hlim an ni thung.

Arsenal hian hliam vangin Shkodran Mustafi an la chhawr thei dawn lo a, Saints an hmachhawn

ṭuma hliam tuar Aaron Ramsey pawh a la inlan thei lo bawk ang. Arsene Wenger chuan, "Mustafi-a'n training a la zawm pumhlum thei lo a, Ramsey pawh a malpuina vangin a la khel thei lo, chutihrualin hun rei tak chhung khel thei lo tur ang chi erawh a ni lo," a ti.