FIFA Club World Cup Champion lai Real Madrid inlan dawn

Real Madrid-in kum 2017 chhungin nomawi pali an chawi tawh a, kum tawp hman hmain nomawi dang chawi theihna hun ṭha an la nei leh dawn–FIFA Club World Cup semifinal khel turin Abu Dhabi-ah zanin dar 10:30 hian Al-Jazira an hmachhawn ang.

Spanish club ropui hian kuminah La Liga, Champions League, UEFA Super Cup leh Supercopa de Espana te an chawi tawh a, Club World Cup hi an chawi leh a nih chuan he inelna huanga champion hnem ber Barcelona nihrualin an vawi thum champion-na tur chiah a ni dawn a ni.

Zinedine Zidane-a naute hian Inrinni zan khan La Liga inkhelah an elpui Sevilla chu Bernabeu-ah 5-0 ngawtin an sawp thei a, an tlarhma an hriam bakah an tlarhnung an phui ṭha hle–inrintawkna sang tak nen Abu Dhabi an pan thei, an hmachhawn tur hi UAE Arabian Gulf League champion Al-Jazira an ni.

FIFA Club World Cup?

Khawvela football thuneitu sang ber Federation Internationale de Football Association (FIFA) in a buatsaih FIFA Club World Cup hi kum khat chhunga khawmualpui paruka champion te ṭheuh tana buatsaih a ni ṭhin.

Khawmualpui paruk UEFA (Europe), CONMEBOL (South America), AFC (Asia), CAF (Africa), CONCACAF (North America, Central America, Carribean) leh OFC (Oceania) champion ṭheuh an kalkhawm a, heng team paruk bakah hian a thlengtu ram aṭangin an league sang ber champion chu an inlan tel ve bawk.

Inelna kalphung

Club World Cup hi knock out a khelh a ni a, team pasarih an inlan avangin OFC Champions League nomawi chawitu leh a thlengtu ram club chuan quarterfinal lut turin playoff an khelh hmasak a ngai. Quarterfinal-ah hian AFC, CAF leh CONCACAF champion leh playoff paltlangte an inlan ṭhin.

Qurterfinal paltlangte chuan semifinal-ah UEFA emaw CONMEBOL emaw champion tzawkte an hmachhawn ṭhin. Kuminah hian Real Madrid leh Brazilian club Gremio te an inlan ṭan; Pachuca hian quarterfinal-ah Moroccan club Wydad Casablanca an hneh a, a thlengtu Al-Jazira erawh playoff aṭanga tling an ni thung.

Kum 2000 Juanary thla aṭanga khelh ṭan he inelnaah hian Barcelona chu champion hnem ber niin vawi thum an champion tawh a, Real Madrid bakah hian Manchester United, AC Milan, Inter Milan leh Bayern Munich te an champion tawh a, Brazilian club Corinthians (2 titles) leh Sao Paulo ten nomawi an chawi tawh bawk.

Rinkai Real

UEFA Champions League champion Real Madrid hi rinkai ber tia sawi ngam an ni, an khingpui tur Al Jazira hi a thlengtu an nih bakah UAE Pro-League champion an ni a, Real an hmachhawn theih nan hian New Zealand club Auckland City leh Japan club Urawa Red Diamonds te an hneh a ni.

French manager Zinedine Zidane kaihhruaina hnuaiah Real Madrid hian tun hnai season hnih chhung chu Champions League an champion hnuah FIFA Club World Cup an chawi leh thei. Kum 2014 khan Argentine club San Lorenzo an hneh a, nikum khan Japanese club Kashima Antlers an hneh thung.

A pawimawh

Club World Cup-ah hian Cristiano Ronaldo-a'n goal nga a khung tawh a, Barcelona hmatawng Luis Suarez leh Lionel Messi te nen an intluk chiah–Portugal captain hian goal dang a khung belh thei a nih chuan chuh buaitu awm loin top scorer a ni ang.

Sulhnu hlui kan en chuan Messi hming a lang tel zel, Argentina captain hi Best Player tan vawi hnih thlan a ni tawh a, record nei ṭha ber a ni. Kuminah hian Real Madrid forward Ronaldo leh defender Sergio Ramos ten Messi record nih rual theihna hun an nei dawn.

Real Madrid manager Zidane chuan, "Mi ṭhenkhat chuan a awlsam dawn niin an sawi, chutiang chu a ni dawn lo. Khawmualpui pakhat aṭanga team ṭha kalkhawmna a nih tawh chuan a nep thei lo, keini pawhin nomawi nena haw ngei tumin kan bei ang," tiin a sawi.

Zidane chuan sawi zawmin, "Season tluan chuan chet fuh lai leh a fuh loh lai chu a awm tur a ni. La Liga leh Cup dang chawi thei turin thla ruk dang hun kan la nei a, a la tam tawk. Tuna pawimawh hmasa chu kumin chhunga nomawi dang chawi belh tum hi a ni," a ti.

La Liga champion lai Real Madrid hian hmahruaitu Barcelona chu point riatin an phak lo mek a, December 23 zan hian El Clasico khel turin Catalan club hi an mikhual dawn, league match hautak khelh zui tur an neih avangin Zidane-a'n a squad a siksawi deuh a nih pawhin a mak lo ang.