Derby buaina : Pep-a'n ngaihdam a dil

Manchester City manager Pep Guardiola chuan derby-a hnehna an chan zawha an lawm danin Manchester United pawi an sawi a nih chuan pawi a tih thu a sawi a, ngaihdam a dil nghal bawk.

Pathianni zan khan Old Trafford-ah City-in United 2-1 in an hneh a, inkhelh banah dressing room kalkawngah buaina a chhuak a, sawi zui a hlawh hle.

City manager Pep chuan, "Jose chauh ni loin, player pakhat chauh ni loin, Manchester United pawi kan sawi a nih chuan ngaihdam ka dil a ni," tiin club pawi sawi tumna an neih loh thu a sawi.

Spanish manager chuan, "Hnehna kan chang a nih chuan kan lawm tur a ni. Kan lawm lai hmu thei lo an awm a nih chuan kan tih theih bak a ni a, derby-ah kan chak miau a, mi zawng zawng tan lawmna siam theih a ni lo. Manchester United pawi sawi kan tum lo a, kan tum chu dressing room-a lawm a ni," tiin Jose Mourinho ni loin an ngaihdam dilna chu United a nih thu a sawi.

United manager Mourinho pawhin buaina chungchang tho zawhna a dawng a, Portuguese manager chuan, "Hei hi chu kan rilru sut thlek dan hmang a ni - nungchang, zirna lam leh kan thil thlir dan a kawk daih. Arsenal kan hneh ṭuma Emirates Stadium-a kan chet dan a dang daih a ni," tiin Old Trafford-a City player-te chet dan chu a dem thu a sawi.

Bournemouth an hma­chhawn hma press conference-ah hian derby buaina chiah an zawt hman tihin Mourinho hian conference room a chhuahsan a, United boss chuan, "Bournemouth zahna in nei lo a, an chungchang min zawh in tum lo. Old Trafford-a che ṭha turin in beisei lo em ni? Eddie Howe leh a player-te zahna in nei lo a ni," tiin a lungawi loh thu a sawi tel hram bawk.

Nizan khan City-in Swansea an hmachhawn a, United leh Cherries an inkhel bawk a, result kan hre hman lo.