Stoger hnuaiah Dortmund chak nghal

Borussia Dortmund-in result ṭha an neih theih loh avangin manager Peter Bosz an ban a, ma­nager thar Peter Stoger kaihhruaina hnuaia an match hmasa ber atan Mainz hmachhawnin si hnih faiin hnehna an chang nghal.

Thawhlehni zan Bun­desliga inkhel­ah Dort­mund tan hian Sokra­tis Papasta­tho­poulos leh Shin­ji Kagawa ten goal an khung a, September thla hnuah league match bika hnehna an chan lehna hmasa ber a ni; table-ah pali­na­ah an inhlangkai bawk.

Table mawngphaha awm Cologne-in Stoger hi an ban hlim a ni a, a team thar Dortmund hi a zawna match 13 chhung chak ni hmel hmu thei tawh lo an ni thung. Cologne a enkawl laia chak ni hmel hmu miah lo Stoger hian a club thar tana a match hmasa bera hnehna chan hi chanchin ṭha a ni.

Dortmund manager Stoger chuan, "Kei leh team tan chuan chanchin lawmawm bik a ni, hun rei tak chak ni hmel kan hmuh theih tawh loh hnuah hnehna kan chang ve leh ta a, lawmna dang pawh kan dawn belh zel theih ka beisei," tiin a sawi.

Mainz an hneh hma khan Dortmund hian Bundesliga bikah a zawnin match riat chhung hnehna an chang thei lo a, tun hnai kum 18 chhunga an record chhiat ber ṭum an tawng mek. Champion lai leh hmahruaitu ni bawk Bayern Munich an phak lohna chu point 10 a la ni mek.