Chelsea dah bo theih an la ni lo

Premier League champion lai Chelsea chuan West Ham an hneh loh hnuah John Smith's Stadium-ah Huddersfield Town chu 3-1 in an luh­chhuah. Italian mana­ger Antonio Conte-a'n nomawi humhim a beiseiawm loh thu sawi tawh mah se Lon­don club hi eng team tan mah tum châkawm an ni lo.

Thawhlehni zan in­khelhah Blues tan Tie­moue Bakayoko (23'), Willian (43') leh Pedro (50') ten goal an khung a, Terriers goal awmchhun hi injury time-a substitute Laurent Depoitre tauh luh a ni.

Point 11+

Chelsea-in hnehna an chan chiah hian point 35 an hmu a, hmahruaitu Manchester City an phak lohna erawh point 11 a la ni tho. Nizan lama City-in Swansea an hneh a nih chuan an inthlauhna hi point 14-ah a chho leh ang.

Italian manager Conte chuan, "Thil hi a nihna ang taka kan dawnsawn thiam ṭul ṭhin. Chuvangin dawt thiam taka sawi ai chuan thudik sawi mai ka thlang a ni. A uchuak hretin dikna ka ngaina a ni thei a, amaherawhchu kei chuan ka player-te leh min ṭantute hnena thudik sawi hi ka duh dan a ni," tiin Huddersfield an hmachhawn hmaa a thusawi chungchang a sawifiah.

Blues hian Terriers lakah point thum an hlawh satliah lo a, hnehna chang turin inkhel a thunun a, manager erawh a la ṭawng fimkhur thung. Conte chuan, "Kan kawng zawh a dik chho a, chutihrualin he kawng hi team dang pawhin an zawh a ni. An kal thui tawh avangin dan an harsa dawn a ni," tiin Manchester City el phak a har tur thu a sawi.

Chanchin dang

Blues hian December 16, Inrinni zanah Sou­thampton an mikhual dawn. Terriers an hneh

ṭum­in Morata inhliam mah se Michy Batshuayi-a'n starting eleven-ah khelhna hmun a chang pha lo a, hun tawp lam minute 21-ah a inlan thung. Belgian striker Batshuayi hi January transfer-a chhuak tur anga sawi thawm a ri ring hle.

Kum 17 mi Ethan Ampadu chuan minute 10 chhung a khel bawk a, Wales tana vawi hnih inlan tawh defensive midfielder Ampadu hi midfieler Jody Morris (1996) dawt a Chel­sea tan­a inlan naupang ber a ni.

Thawhlehni zan inkhel dangah Burnley chuan hun tawp dawna sub­stitute Ashley Barnes-a goal hmangin Stoke City 1-0 in an hneh a, league table-ah palina an ni!

English manager Dyche chuan, "Football hi a tih a tih a ni a, chutih rualin suangtuahna a nihna chen pawh a awm ve tho. Hetiang anga hnehna chan hi kan tan thil awlsam a ni lo, Leicester City khan football hi duhthusam thlen diktir theihna a nih zia an lantir tawh a ni," tiin Foxes-in khawvel barakhaiha league nomawi an chawi chungchang a sawi lang tel.