Mohun Bagan khelmualah Lajong fiahna
Vawiin tlai dar 5:30-ah I League match khat khelh tur a awm dawn a, Mohun Bagan chuan Shillong Lajong an mikhual dawn–Bagan hi Churchill Brothers laka 5-0 ngawta hnehna chang hlim an ni a, Shillong Lajong erawh 5-1 a East Bengal laka tlawm hlim an ni thung.
Result hnuhnung ber aṭanga chhutin Bagan chu chak beiseiawm zawk an ni a, point aṭanga thlir erawhin club pahnih hi point khat chauha inthlau an ni–Shillong-in Kolkata khawpui aṭanga point hawn miah loa haw an duh lo ang a, Bagan-in an muala tlawm an duh lo ang.
Hei le Samuela!
Shillong Lajong-in tun season atana club captain tur an puanin Mizo rawlthar Samuel Lalmuanpuia chungah mawhphurhna lian zawk an nghat a, Zemabawk North striker hi an captain a nih tur thu an puang–Meghalaya club thuneitu ten Samuel-a chungah an rinna an nghat ngam a, chumiin a ken tel chu 'beiseina' a ni.
Meghalaya club thuneituten Samuel-a an beisei thlawn lo. Lajong rawlthar hian kum naupangte nichungin Shillong club beiseina phur mah se a theihna a pholang a, match hmasa bera 1-0 a Gokulam FC an hneh ṭuma goal awmchhun chu a assist a ni a, Churchill Brothers laka 2-0 a an chak ṭumah pawh assist nei lehin EB laka an mualpho ṭum pawhin an goal neihchhun chu freekick aṭangin mawi zetin a khung–zaninah Bagan tlarhnung tan ven bik a sual lo ang.
Lajong an ṭha
East Bengal lakah Lajong tawlhthlu mah se an match hmasa pahniha a zawna hnehna chang thei team hi an chhe lo–tlarhma lamah goal nawr turin Mizo rawlthar Samuel-a bakah winger duhawm Redeem Tlang, Assamese rawlthar Alen Deory leh Ivorian striker Abdoulaye Koffi an nei a, an chhe lo.
Oman league leh Saudi Professional League lama lo khel tawh Koffi hian professional football a luhchilh hnuah match 133 khelin goal 71 ngawt a khung tawh a, Bagan tan hna harsa siam turin a ṭha tawk. Tlarhnung lamah Oh Juho khelh ṭhat a ṭul dawn a, South Korea U18 leh U23 tana lo khel tawh defender hian amah thawhpui turin Liberian defender Laurence Doe puihna a mamawh bawk ang.
Kim lo Bagan
Match thum an khelh tawh aṭangin Mohun Bagan-in point sarih an hlawh chhuak thei a, an player neih dan leh khelh dan en phei chuan tun season I League champion beiseiawm ber pawl an ni–mahse, Churchill Brothers laka 5-0 a an chak ṭumin Bagan-in lawmna karah lawm lohna tur an nei a, an player pawimawh Sony Norde, Yuta Kinowaki, Ansumana Kromah leh Arijit Bagui-te chu he match-ah hian an inhliam vek!
Bagan coach Sanjoy Sen chuan Yuta hliam hi uluk zawka enfiah a ṭul thu a sawi avangin Aizawl FC midfielder hlui hian Bagan a hmachhawn theih a beiseiawm kher loh a, Bagan ṭantute rilru ti hah zual turin Norde leh Kromah chuan club training an la zawm lo–Lajong tan thu lawmawm a ni. Hetihrual hian defender Arijit Bagui erawh a inkhel thei dawn thung.
Lungphang lo la!
Bagan assistant coach Shankarlal Chakraborty chuan, "Sony leh Kromah hi an khel thei lo a nih pawhin an hmun ruak luah tur player ṭha tak tak kan nei a, lungphang tur kan ni lo. Mahse, kan beiseina hmasa erawh anni hi an ni a, Lajong an hmachhawn theih hram kan beisei," tiin an player pawimawh pahnihah hian beiseina erawh an la neih thu an sawi.
Mohun Bagan hian season hmasa khan Aizawl FC chu point khat chiaha phak loin nomawi an chawi lo a, tun season-ah nomawi chawi ngei tuma sum pawh an insen hnem avangin an player ṭhate inlan thei lo pawh ni se Lajong lakah point thum aia hniamah an lungawi lo ang–Bagan tan hian Mizo tlangval Ricky Lallawmawma chu player pawimawh a ni a, Durtlang defender hian league match thum an khelh tawhah a hmel a la lan kim vek.