Chris Gayle-a'n record siam leh ta

West Indies batsman ropui Chris Gayle chuan Bangladesh Premier League final-ah Rangpur Riders tan six vawi 18 ngawt a vaw chhuak a, cricket khawvelah match khata heti zat six vaw chhuak thei batsman an la awm ngai lo–Gayle hian ama record tho a khum a, kum 2013 khan Indian Premier League-ah Royal Challengers Bangalore tan Pune Warriors laka hnehna an chan ṭumin six vawi 17 a lo vaw chhuak tawh.

Gayle hian Twenty20-ah run 11,000 a siam tling ta bawk a, heti zat run siam thei hi Twenty20-ah an la awm ngai lo–Rangpur tan hian ball 69-a hmachhawnah run 146 zet a vaw chhuak bawk a, T20 final awm tawha run siam hnem ber dinhmun a luah nghal bawk.

Windies legend hian BPL lamah season duhthusam a hmang mek a, match 11 a khelh tawhah run 485 siamin chu chu chawhrualin match khata run 54 zel siam ang deuh thaw a ni a, run 146 a siam hi T20-a run siam hnem lamah 10-na niin Royal Challengers Bangalore tana run 175 a siam chu IPL-a run siam hnem ber a la ni ta reng bawk.

Gayle-a T20 record
T20 innings a six siam hnem ber–18
T20 innings-a run siam hnem ber–175 not out
T20 hundred tam ber–20
T20 century rang ver–30 balls
T20 international century, ODI double century leh Test triple century siam thei awmchhun a ni.