A hun a thleng ta - Pro MMA fight

Mizoram State Mixed Martial Arts Association (MISMA) leh Zonet ṭangkawpin an buatsaih GRIT- ‘International MMA professional fight night’ chu zanin dar 8:00 hian neih a ni dawn ta.

PUC Auditorium, College Venga fight neih turah hian fight hmuhnawm paruk en tur a awm dawn a, Rs. 100 leh Rs.200 leka professional fight kan khawtuala chhawpchhuah a ni tur hi MMA ngainatute tan chuan vanneihna tih loh rual a ni lo.

All India MMA Association (AIMMAA) sanction-na hnuaia neih tur fight-a tel tur hian Afghanistan, Congo leh Por­tu­gal fighter te an lo kal a, India ram chhung aṭangin Mizo professional fighter bakah Meghalaya leh Assam aṭangin fighter langsar an rawn tel bawk ang.

Mizo inlan tur
MMA professional fight night-ah hian Mizo fighter pali an inlan dawn a, Lalremruata Hau­hnar, Xico Zorinmawia Tekashi Zorammawia, David Lalrinzuala Sailo leh Zonunthara Tlau te niin an zingah tawnhriat nei ngah Tekashi chungah beiseina a sang a, 'The Tanker Creed' tia hming­lem an pek fighter hian Afghanistan fighter Nasratullah chu lightweight-ah a hmachhawn dawn.

Mizo MMA fighter zing­ah Zorammawia hming lam hmaih a thiang lo. Mizo tlang­val, international MMA fighter Zorammawia hi striker a nih laiin a hmachhawn tur Portuguese fighter Rahim Xec erawh grap­pler a ni thung a, tawnhriat nei ngah pahnihin an 'style' ve ve hlawh­tlinpui tuma an inhma­chhawn tur hi en phal loh chi a ni dawn lo.

Fight nghahhlelhawm
Zanina fight neih tur zinga main event-a Mizo fighter Lalremruata Hauhnar (Mapuia) hi mipui hmuh chak a ni - a hmaa ding tur hi Congo fighter Tresor MT a ni. Fighter pahnih style hi 'muay thai' ve ve a ni bawk a, zaninah style in ang, tharum ngah leh fighter rothap pahnih an inhmachhawn dawn!

‘Golden Elbow’ tia hminglem an pek Mapuia hian Australia lamah pawh fight record ṭha tak a lo nei tawh a, mahni tualah mikhual tlangval hneh loh a duh lo ang - chutihrualin Tresor hian Congo aṭangin tlawm tur ringawtin India a rawn pan lo ang tih a chiang a, fighter pahnih inhmachhawn tur mipuiin an nghakhlel hi a awm lo hran lo.

Sum tamna
GRIT- ‘International MMA professional fight night’ a fighter chah chhuahte hi MIMSA leh he fight sponsor-tu JSJ FitPro chuan an kal man leh thlenna senso zawng zawng buaipuiin a tum sak vek a, fight vawi khat an neihah hian Rs. 30,000 an hlawh thei dawn bawk.

JSJ FitPro neitu Dr. Jeremy L Pautu chuan, "Tun hi kan bul ṭanna chauh a la ni a, nakkum lamah tun aia lian zawka kal zel theih pawh kan inbeisei a ni. MMA hi khawvel huap pawhin a lar chak em em a, Mizo ṭhalaite tan pawh eizawnna tlak a nih thuai ka beisei a ni," tiin a sawi. He event atana hian USI Universal company chu equipment partner a ni.

Zanina fight neih tur
Tresor MT, Congo vs Lalremruata Hauhnar, Mizoram
Rahim Xec, Portugal vs Xico Zorinmawia, Mizoram
Nasratullah, Afghanistan vs Tekashi Zorammawia, Mizoram
Evariste T, Congo vs David Lalrinzuala Sailo, Mizoram
Zonunthara Tlau Mizoram vs Manash Daimary, Assam
Matiullah Sayedi, Afghanistan vs Ariestone Ryndongsngi, Meghalaya