MPL7 khel tur Chawnpui FC
Mizoram Premier League khel tur zawnna MPL7 Qualifier-ah Chawnpui FC an champion a, season tharah Mizoram chhunga football inelna sang ber MPL an khel ang.
Nimin RG Stadium-a Chawnpui leh New Serchhip inkhel boruak sang takah player pali ngawt hnawhchhuah a ni a, injury time minute thumnaa Lalhmangaihtluanga goal hmangin Aizawl DFA hnuaia club an chak hram. Inkhel hi chak zawk awm lo se New Serchhip hi goal difference hmanga MPL khel tur a ni a, Mizoram inelna sang ber an khelh lohna hi minute tlem te chauh a ni.
Serchhip an vanduai
New Serchhip-in an first keeper Laldanmawia inhliam vangin minute 58-naah an thlak a, Danmawia thlaktu pawh inhliam vang thoin minute 79-naah thlak leh a ni a, ṭul loah player pahnih an thlak bakah player pangngaiin goal ven a ṭul phah.
Hun tawp hma hretin team pahnihin chet mawi loh vangin player pahnih ve ve an chan leh a, RG Stadium a len avangin New Serchhip tan goal venhim a har sawt a, an ṭang tluan thei ta lo.
Gosen-a hote
MPL-a Chawnpui petling puitu coach Gosen Lalrammawia a ni a, ani hi MPL-a Aizawl FC pet tlin puitu coach a ni a, tualchhung football-ah mi thar a ni tawh lo.
Chawnpui FC coach Gosen-a chuan, "Kan hlim khawp mai, MPL khelh tumin theihtawp kan chhuah a, kan tlin dan kha a lawmawm lehzual. Kan vanneih vang liau liau a ni," tiiin Vanglaini a hrilh.
Playoff khel tur Zo United
Inkhel dangah Zo United chuan chuan Serchhip club IOC chu 4-1 in an hneh a, playoff khel turin an tling. Aizawl DFA champion Zo United hian December 19 leh 21 khian MPL6-a pasarihna Chanmari West nen double legged playoff hmangin MPL khel tur an zawng ang.
Zo United hi MPL5 aṭanga an releagte hnuah Aizawl DFA First Division-ah an champion nghal a, amaherawhchu qualifier-a match hmasa pahnihah an khingpui an draw ve ve avangin MPL khel turin an hmabak a harsa dawn. MPL Playoff history-ah Chhinga Veng FC chiahin MPL club nilai (MPL hnuhnung bera 7-na) an hneh.
Nimin Inkhel Results
Chawnpui 1 - 0 New Serchhip.
CPFC : Lalhmangaihtluanga 90+3'
IOC, Serchhip 1 - 4 Zo United
IOC : Henry Lalhruaitluanga 38'
ZUFC : Laqlmalsawma 65'; R. Lalthantluanga 73', 77'; Ramdinmawia 75'
Team Dinhmun
# Club P W D L GF GA GD Pts
1 Chawnpui FC 3 2 1 0 6 4 2 7
2 Zo United FC 3 1 2 0 7 4 0 5
3 New Serchhip FC 3 1 1 1 4 3 1 4
4 IOC, Serchhip 3 0 0 3 4 10 -6 0