Champion tur a la chiang lo - Mourinho

Manchester United boss Jose Mourinho chuan, "Premier League champion tur chu chiang tawh se chuan Brazil-ah emaw Los Angeles-ah chawlh hmang ka thang bo daih tawh ang," tiin Bournemouth 1-0 a an hneh zawhah a sawi.

United-in point thum an hlawhchhuah theih nan Romelu Lukaku chuan minute 25-naah Juan Mata cross chu a tauh lut a, goal dang a luh belh tawh lo. Belgian striker hian tun hnaia goal khung a harsat avangin sawisel hlawh mah se tun season-ah goal 14 a khung tling tawh.

Old Trafford-ah mual­neitu che ṭha tawk lo mah se inhliam vanga khel mumal lo Luke Shaw leh rawlthar midfielder Scott McTominay te khelh dan­ah United ṭantu leh manager Mourinho te an lawm ang.

Portuguese manager Mourinho chuan, "City nena kan inkhel kha a pawimawh em em a, chu­vangin a nghawng pawh a lian. Kan chak loh avangin ngai awh a harsa. Tun ṭuma kan chak hi phur chhoh leh nan a pawimawh a, team ṭha tak Bournemouth kan hneh hi a lawm awm a ni," tiin a sawi.

United hian Pathianni zan dar 7:45-ah West Brom hmachhawn turin Hawthorns an tlawh ang.