Team dang chunga leng Man City

Manchester City chuan David Silva goal hnih hmanga Swansea City hnehin inelna hrang hrangah a zawnin match 15 chhung hnehna an chang zawn ta. Pep Guardiola naute hian Premier League-ah point 49 hmuin pahnihna Manchester United aiin point 11 zetin an sang fal zawk tawh.

Nilani zan inkhelah City tan midfielder Silva-a'n goal hnih a khung bakah Kevin de Bruyne leh Sergio Aguero ten goal an khung bawk. Spain international Silva hian West Ham leh Man United lakah goal a khung tawh bawk a, league match 17 an khelh tawha goal 52 an khung theih nan player ṭangkai leh thawhhlawk a ni.

City manager Guardiola chuan, "David hi player ṭha chungchuang a ni a, mitin hian inhrilh nawn ngai loin a thiam zia kan hre vek. A theihna a sangin hruaitu ṭha a ni bawk a, hnehna chan zel duh mi a ni," tiin Silva a dahsang hle. Pep hian a tlarhmate an hriam tawk loh ṭum pawha midfielder goal khung thei an neih avanga a lawm thu a sawi tel bawk.

Goal khung lo pahnih

Season tir kha chuan Liver­pool leh Arsenal ten league nomawi chawi an beisei a, tunah erawh a sang pali zinga tel phak chu an thil tum a nih a ngai tawh - club lian pahnih hi tun hnaia hmasawn Tottenhma hnuaiah an awm mek. Spurs hian Serge Aurier leh Son Heung-min te goal hmangin kai thar Brighton chu 2-0 in an hneh.

Liverpool manager Jurgen Klopp-a'n West Brom nen goal awm loa an inhnehtawk chungchangah an vanneih tawk loh thu a sawi. German manager chuan, "Kan khelh chhiat ni a ni hran lo, chak turin kan vannei tawk lo a ni. Kan hriam tawk lo a, chu chu kan pawm thiam a ngai," tiin a sawi.

David Moyes-a nauten London Stadium-ah Chelsea an hneh hnuin Arsenal an mikhual leh a, North London club nen hian goal awm loin an inhnehtawk. Gunners hian hnehna chang se a sang pali zinga tel thei an ni a, an chak zawh loh avangin pasarihna an ni.

Arsene Wenger-a'n kum 2016 May thla hnua a vawi khat nan Jack Wilshere chu Arsenal tan league match-ah inkhel bul a ṭantir a, striker manto ber Alexandre Lacazette chu bench-ah dah niin France international Olivier Giroud-a'n bul a ṭan bawk - Arsenal hian ball possession 70% nei mah se point thum an hmuh phah lo.

Inkhel Result
Swansea City 0 - 4 Manchester City
Newcastle United 0 - 1 Everton
Southampton 1 - 4 Leicester City
West Ham United 0 - 0 Arsenal
Manchester United 1 - 0 AFC Bournemouth
Liverpool 0 - 0 West Brom
Tottenham Hotspur 2 - 0 Brighton