Real tan Ronaldo leh Bale

European champion Real Madrid tan 2017 FIFA Club World Cup final kalkawng a awlsam lo, Nilai zan khan Cristiano Ronaldo leh Gareth Bale te goal hmangin Al Jazira chu 2-1 in an lehthal hram. Los Blancos hian final-ah South American champion Gremio chu December 16, Inrinni hian an hmachhawn ang. Inrinni vek hian Al Jazira leh Pachuca ten final khelhna tur hmun Zayed Sports City Stadium, Abu Dhabi-ah pathumna an zawng ve bawk dawn a ni.

Real an buai

Zayed Sports City Stadium, Abu Dhabi-ah Real-in inkhel thunun a, Spanish club tan Ronaldo, Luka Modric leh Karim Benzema te goal hmaah an hlauhawm nghal a, mualneitu lamin an goal neih an hum hram hram a ni ber.

Spanish club tana Bezema tauh luh chu Ronaldo-a'n amah vengtu a nam avangin pawm a ni lo a, Brazilian midfielder Casemiro goal khung chu offside vanga pawm a ni lo bawk. Referee thutlukna hnuhnung zawk hi video assistant referee (VAR) hmanga thutlukna siam a ni.

Real goal khung hun nghaka entu mipui lamin an thlir ṭhup laiin Al Jazira zawkin goal an khung a, Romarinho chuan minute 41-naa a goal chance hmasa ber chu goal-ah a chantir a, first half-ah 1-0 a ni.

Second half-ah Al Jazira zawkin chance ṭha an nei a, player pahnihin keeper Keylor Navas chauh an hmachhawn nachungin goal khungtu zawk Mbark Boussoufa chu a offside hman, VAR hmanga ennawn a nih hnuah Al Jazira goal hnihna ni tur hi pawm a ni lo. Asian club tan an chance ṭha hloh a uiawm a, keeper che

ṭha Ali Khaseif inhliam vanga lakchhuah a nih avangin Real buaina a ziaawm phah bawk.

Team ṭha an dang

Champion lai tan Ronaldo bawk a inlar a, Portugal captain hian minute 53-naa an siphurh a sut. FIFA Club World Cup-ah Ronaldo hian goal ruk a khungna chiah a ni a, goal nga khung tawh Barcelona duo Lionel Messi leh Luis Suarez bakah Monterrey forward Cesar Delgado te khumin inelnaa goal khung tam ber recrod a siam.

Real boss Zinedine Zidane-a'n goal khung turin Gareth Bale chu minute 81-naah a luhtir a, Welsh forward hian minute khat pawh tling loah chakna goal a khung nghal. European champion-in talbuai lai nei mah se minute 90 a zawh chuan team ṭha zawk an dang.

Kum 2000 aṭanga ṭan FIFA Club World Cup-ah hian Barcelona chu vawi thum champion tawhin champion ngun ber an ni a, Real hian Inrinni zana Gremio an hneh chuan an hmelma Catalan club hi an tlukpha chiah ang. Los Blancos hian 2014 leh 2016 khan nomawi hi an chawi tawh a, an champion hnuhnung ber hian Ronaldo chuan goal li khungin top scorer a nih bakah best player-a thlan a ni.