Inkhelh tam duh Di Maria

Angel Di Maria chuan France khawpui Paris-ah a hlim thu a sawi a, chutihrualin Ligue 1 hmahruaitu Paris Saint-Germain tan khelmual chhungah hun tam zawk hman theih a duh thu a sawi chhuak.

Nilaini zan khan PSG hian League Cup quarterfinal lut turin Strasbourg chu 4-2 in an hneh a, Di Maria, Dani Alves, Julian Draxler leh Yoann Salmier ten goal khat ṭheuh an khung, an nomawi kawl lai humhim turin kawng dik an zawh. December thlatir khan Strasbourg hian French Ligue 1 lamah PSG hi 2-1 in an barakhaih tawh a, tun ṭumah erawh thawnthu a danglam ta.

Unai Emery-a'n tlarhmaa chhawr tur player ṭha a ngah a, tun season an hman chhoh danah chuan Neymar, Kylian Mbappe leh Edinson Cavani te an intlar tlangpui, player dang chu an khingpui a zira siksawi ṭhin an ni. Real Madrid leh Manchester United winger Di Maria hian khelhna hmun a chang tam tawk lo a ni.

Argentina international Di Maria chuan, "Paris-ah hian ka hlim a, season duhawm tak kan hman mek avangin nuam ka ti hle. Mahse, tun aia tam zawk hi khelmual chhunga hun hman ka duh," a ti. Nakkumah FIFA World Cup khelh a ni dawn a, ram tana inlan phak tur chuan club lama khelh ṭhat a ngai, player tiin Russia-ah an ram aiawhtu nih an chak vek.