Azarenka tan Australian Open wildcard

World number 1 hlui Victoria Azarenka chu nakkum January thlaa khelh tur Australian Open atan wildcard pek a ni. Kum 28 mi Azarenka hian fa a neih hnuah chhungkaw buaina a nei chhunzawm a, season hmasa tawp lam khan US Open bakah Davis Cup final aṭangin a inhnukdawk a ni.

Azarenka hian kumin Wimbledon hnuah match a la khel leh lo a, tun dinhmunah world number 201 niin a ranking aṭang chuan qualifier khelh ngai tur a ni. Mahse, kum 2012 leh 2013-a a champion tawhna hmunah hian duhsak a hlawh a, first round

aṭangin a inlan thei dawn.

Tennis season khat chhungin Grand Slam pali a awm a, a tlangpui thuin world number 100 chin chu an inlan nghal thei a, a hnuai lam tan qualifier khelh a ngai. Tournament buatsaihtu lam hian an inelna hmuna sulhnu nei ṭha leh player thlan bikte tan duhsak takin wildcard an pe ṭhin a, Azarenka an duhsak hi thil tih awm tak a ni.

Belarus star Azarenka chuan, "Austrlian Open hi ka tournament ngainat ber a ni a, Melbourne-a ka inkhel leh thei tur hi ka hlim takzet. Vawi hnih ka champion tawh a, inkhelhna court leh a khawpui hi ka ngaina em em a ni," tiin a sawi.

Tennis season kal lai a zo tawh a, season thara Grand Slam tournament hmasa ber atan Janaury 15 hian Melbourne Park-ah Australian Open an khel ṭan ang.