Tyson Fury-a'n Joshua a cho

British boxer Tyson Fury chu damdawi hman phal loh hman chungchanga thiam loh chantir a nih avanga a inhnek theih loh reng hnuah amah hremtu UK Anti-Doping (UKAD) nen an inrem a, boxing ring chhung a rap leh thei tawh dawn a–Anhony Joshua a cho nghal.

Fury hi February 2015 khan UKAD chuan damdawi hman phal loh a hmang tiin an hrem a, mah se hei hi British boxer hian pawm loin a khinglet. Mahse, tunah erawh Fury hian kum hnih hrem a nihna chu a pawm a, hei vang hian UKAD chuan an in khin chhung kum chu Fury hrem a nih hun chhung atan an pawm sak a ni.

British Boxing Board of Control (BBBofC) chuan Fury hi a licence an pek leh veleh a inlan leh thei dawn a ni. Kum 29 mi boxer chuan, "Khawiah nge i awm ka nau? I tan ka lokal e," tiin IBF leh WBA heavyweight world champion Anthony Joshua chu a cho.

Kum 2015-a Wladimir Klitschko a hneh hnua boxing khawvela a hmel la inlan leh lo Fury chuan sawi chhunzawmin, "Nakkumah chuan ka ṭhatna ber mualah ka lo kir leh dawn ta. Tun hma zawng aia ṭha zawkin ka lo kir dawn a, keima ta ngei world title kha nei let leh turin ka bei dawn a ni. A hun a thleng dawn ta e," a ti a, a inpeih tawh hle.

Fury hian October 2016 khan WBO leh WBA title a kawl lai chu a rilru lamah buaina a neih avangin a tlawmsan a, tunah erawh ring chhunga lut turin a inpeih leh ta.