Sindhu a chak nghal

Badminton player ṭha zual pariatte tana buatsaih World Superseries Finals 2017 chu Nilaini khan Dubai-ah khelh ṭan a ni a, India nula PV Sindhu a chak nghal laiin Kidambi Srikanth erawh a chak lo nghal thung.

Rio Olympic silver medalist Sindhu hian darkar khat leh minute li zet an inkhelh hnuah Chinese nula He Bingjiao chu 21-11, 16-21, 21-18 in an hneh a, Group match-ah a ṭan ṭhat avangin knock out round luh beiseina a nei sang.

Sheikh Hamdan Indoor Stadium-a mipa singles lamah world number Viktor Axelsen lakah Srikanth chu minute 37 chhungin 13-21, 17-21 in a chak lo. World number 4 Srikanth hian a match hmasa berah hnehna chang lo mah se group match pahnih khelh tur a la neih avangin a beiseina a la tawp lo.