Khawvela ennawm ropui ber World Cup

Qatar-in FIFA World Cup an thlen dawn khan sawisel a hlawh hle. Mahse maw, football inelna sang ber FIFA World Cup a ropui a, inelna an ṭan meuh chuan football chhehvel buaina lam ni loin khelmuala thil thlengin ngaihven a hlawh ta zawk.

World Cup awm tawha ropui ber chu a thlirtu a zir a ni thei ang a, chutih rualin team intluktawk dan thlirin tun ṭum World Cup hi a ropui ber ti pawh an ṭhahnem khawp ang.

Group stage aṭangin tun ṭum World Cup hi a ngaihnawm nghal a, last 16-ah a danglam lo. Quarterfinal a hmuhnawm lehzual. Cristiano Ronaldo-a'n World Cup nomawi a chawi dawn ta lo a, Portugal-in Morocco an hneh lo.

Neymar pawhin Croatia lakah goal ropui khung mah se Brazil tan a tawk lo. World Cup history-a ram ropui ber Brazil zinkawng a tawp. Football ram ropui England beiseina chu champion lai France-in an tihtawpsak. English mipuiin kum li dang an nghah a ngai a, captain Harry Kane-a penalty hlah an hre rei khawp ang.

Argentina erawh Lionel Messi hoin semifinal an thleng ta. Kum 35 mi Messi hian a World Cup khelh hnuhnung berah hian Diego Maradona hnung zuiin World Cup nomawi chawi ngei a tum a, match hnih chak chiah a mamawh tawh.

December 13, Thawhlehni zan dar 12:30 hian Argentina leh Croatia ten Lusail Stadium-ah semifinal hmasa zawk an khel dawn.

France leh Morocco ten December 14, Nilaini zan dar 12:30 hian Al Bayt Stadium-ah semifinal hnuhnung zawk an khel ang.

FIFA World Cup 2022
Semifinal
December 13, Thawhlehni zan
Argentina 12:30 AM Croatia

December 14, Nilaini zan
France 12:30 AM Morocco

Third Place
December 17, Inrinni (8:30 PM)

Final
December 18, Pathianni (8:30 PM)