Portugal hnehtu Morocco an tlang!

Cristiano Ronaldo 'meuh' nei mah se Portugal chuan Qatar World Cup quarterfinal an paltlang thei lo. Portugal hi Morocco 1-0 a hneh loin an zinkawng a tawp - African ram zingah Morocco hi World Cup semifinal lut hmasa ber an ni hial.

Inrinni zan quarterfinal inkhelah Morocco hian striker Youssef En-Nesyri-a goal khat hmangin hnehna hi an chang. Walid Regragui-a enkawl team hi mumang ramah an cheng mek a, semifinal-ah chuan England hnehtu France an hmachhawn leh dawn.

Goal khat chauh
Al Thumama Stadium-a inkhelah Ronaldo chu bul ṭantu zingah a tel lo, coach Fernando Santos-a'n Ronaldo aiin last 16-a hattrick siamtu Goncalo Ramos a ring nawn a, forward Joao Felix chu tlarhma lamah zalenna zau tak pek a ni.

Bruno Fernandes-a'n a thlawp Portugal tlarhma an hlauhawm, mahse Felix-a khung tur chu Morocco goalkeeper Yassine Bounou-a'n a lo dansak zel a, tlarhnung an rem kawng ṭhat em avangin African team an nghing bik vak lo.

Minute 42-naah thil chhinchhiah tlak bik a thleng, striker Youssef En-Nesyri leh Ruben Dias ten ball kang an inchuh, player pahnih hi 6ft 2in ve ve a sang ni mah se En-Nesyri a zuang sang fal nalh a, keeper Diogo Costa-a'n ball kal dan a chhutsual bawk.

Portugal midfielder Fernandes chuan remchang nei zui ve mah se crossbar a tih per a, hun tawp dawna Pepe-a tauh luh loh pawh an ui rei khawp ang - hun tawp hma minute riat la awmah Morocco striker Walid Cheddira hnawhchhuah chuan kawngro a su phak lo.

Mumang ramah
African ram zingah tun hmain Cameroon (1990), Senegal (2002) leh Ghana (2010) ten World Cup quarterfinal an lo thleng tawh, mahse tumah hian semifinal an la thleng ngai lo - thawnthu chu ziah danglama ni a, tunah chuan Morocco an rawn lang ta.

Moroccan player leh fans lam an phur em em a, stadium chhungah khan Portugal ṭantute aiin an thawm a ring zawk. Inkhel entute khan Portugal player lamin ball an chan chiah khan nasat takin an lo au buai ṭhin, khelmuala lut ve ang maiin an pawimawh.

Walid Regragui-a khan West Ham player Nayef Aguerd, Bayern Munich defender Noussair Mazraoui leh captain Romain Saiss te hliam vangin an thlak a ngai a, khatiang chung khan Portugal an dangchat thei tlat.

An neih langsar Hakimi Ziyech leh defender ṭha bik Achraf Hakimi te an chhawr thiam em em a, player zawng zawngin 100% rilru an pe bawk. Belgium an hneh khan mak tih a hlawh a, Spain an hneh phei chu mak tak a ni, tunah Portugal an hneh leh bawk - an hmabak chu France.