Hun hnuhnung chu...

Cristiano Ronaldo hi player ropui bik a nihzia sawi nawn a ngai lo, a duhthusam ti kum tur erawh chuan World Cup champion nomawi chawi a ngai, chumi ti thei tur chuan khelhpui a nei ṭha tawk bawk.

Mahse, famkim lohna khawvelah Ronaldo tan pawh duh zawng zawng neih vek theih a ni lo. Portuguese captain hian World Cup vawi nga a khel a, knockout stage chinah goal a khung miah lo a ni.

Kum 37 mi a ni a, a vanglai a pel tawh. Qatar World Cup match hmasa lamah chuan bul ṭantu zingah a tel ṭhin, knock out stage chinah erawh coach Fernando Santos-a'n a thlauh thla a, thlan hmasak 11 zingah a telh ta lo.

Morocco lakah minute 51-naah bench aṭangin a lut a, ram tan match 196 khel tlinin international match khel hnem ber record a nih rual. Mahse, vawi 10 chauh ball a tawk a, minute 91-naah shot nei chauhin Morocco keeper Bono a paltlang thei lo.

Ronaldo chungchang zawhna chhangin Portugal coach Santos chuan, "Cristiano hi player pawimawh leh ṭha bik a ni a, kan mamawh hunah chuan khelmualah a lut. Bul ṭantu zinga ka thlan loh chungchangah chuan inchhirna ka nei lo," tiin a sawi.

Portugal tan Ronaldo hun a liam ta tiin a sawi theih a, tunah hian club nei lo a ni mek bawk! Manchester United nen an inṭhen tawh a, nakkum January thlaah club thar a zawn a ngai dawn, atan football hun hnuhnung takzet a ni ta.

Tun hnaia Ronaldo tawrhna:
• A fapa piang hlim a thi.
• Erik ten Hag-a'n Premier League-ah a chawr duh lo.
• A hmangaih Manchester United nen boruak ṭha lo takin an inṭhen.
• Portugal coach Fernando Santos-a'n bul ṭan turin a thlang lo.
• FIFA World Cup-ah Morocco hneh loin an tla, inelna lian berah hian a lo kir a rinawm tawh lo.