Football-in rûn a lawi dawn lo, a pawi mang e!
England football fan-ten beiseina sang tak nen, "It's coming home," (football-in rûn a lawi dawn e) tiin zai vawr mah se, football-in - Qatar-ah England-in World Cup nomawi an chawi dawn lo!
Inrinni zan khan world champion lai France chuan England tan an la sang hret tih pholangin, Three Lions hi 2-1 in an hneh a, Aurelien Tchouameni leh Olivier Giroud ten France tan goal khat ve ve an khung.
France hian ṭum hnih hma an hruai - a hmasa zawk hi Harry Kane chuan penalty hmangin a sut a, a vawi hnih nan penalty hmang vekin sutna remchang nei leh mah se a chhuih goal tawh lo.
England tana Kane-a'n penalty a hlah hian minute 84-na a ni tawh a, Three Lions tan a pawi vawng vawng - world champion ni turin kum li dang an nghah leh phawt a ngai a, an puanthuah telin Qatar an mangṭha.
A goal hma
England leh France-in team ṭha an ni tih an inhre ve ve a, an fimkhur ve ve avangin beisei angin inkhel a hmuhnawm tawklo - hetichung hian goal hmu tur erawhin nghah rei a ngai lo hle.
Minute 17-na lekah Griezmann-a siamsak chu Tchouaméni chuan box pawn aṭangin mawi zetin goal-ah a chantir a, Three Lions tana si ban nghaktu Jordan Pickford tan tih theih a awm lo.
England-in first half-ah chance hlauhawm tia chhal tur an nei lo a, second half ṭantirah erawh an hlauhawm hle - rawlthar duhawm Jude Bellingham-a'n chance duhawm a nei a, mahse, Hugo Lloris khelh ṭhat zan a tawng tlat!
Three Lions tan Bukayo Saka a hmuhnawm a, Arsenal forward hian a tlan chakna leh ball thiamna hmangin France tlarhnung a chhaih mangang ṭhin a, minute 54-naah penalty a hlawh chhuak ta nge nge.
Van a duai
Saka penalty hlawhchhuah pet turin Kane a lo pen chhuak a, English striker hian Tottenham Hotspur tana a khelhpui, amah hrechiangtu Lloris goal venah chiang zetin a chhuih lut - England tana goal khung hnem ber Wayne Rooney (53 goals) a nih rual.
England-in minute 70-naah chance an nei zui a, Jordan Henderson-a free kick ṭha zet chu Manchester United-a hmun chang phâk lo Harry Maguire chuan ṭha takin lo tauh mah se a vanneih zan a ni lo.
Minute sarih a liam a, France-in chance an nei. Mahse, Ousmane Dembélé-a siamsak chu Giroud-a'n tlu chungin lo shot mah se Jordan Pickford paltlang nan a tling tawk lo a, 1-1 a nih chhunzawm.
Mahse, minute hnih em pawh a liam lo, Pickford-a'n save ṭha tak a neih hnuah a ṭhiante a hauhna chil per pawh a hul hman lo - Griezmann-a siamsak chu Giroud chuan ṭha zetin a tauh goal a, kum 36 mi striker hi a la tar mawlh lo!
Beiseina thamral
England-in goal an chhuah hian minute 12 chiah hun tawp nan a awm tawh a, Three Lions tan thawhleh a harsa tawh dawn tih a lang - mahse, Gareth Southgate-a naute hi an huaisen tlat.
Minute 84-naah Theo Hernandez chuan substitute Mason Mount chu box chhungah a titlu a, referee-in video assistant a rawn hnuah penalty spot a kawk a, England fan-te thawm chu ring tak a ni.
Mahse, beisei loh thil a thleng - penalty hlah khât tak Kane a lo pen chhuak a, Spurs striker hian bar chung lamah a penalty a thlawh luah! Kum 29 mi striker hian a kawr nghawng seh chungin van lam a hawi a, pawi a ti takzet tih hai rual a ni lo.
Al Bayt Stadium, Al Khor-a England fan-ten an tukhum dawm chungin lei lam an en a, fans ṭhenkhat an ṭap - an tan beisei tur a tlem tawh tih an hai lo a, an mittui hul hmaa hamrik tawp ham niin, Qatar an mangṭha.
Fak tlak France
England tan Declan Rice leh Saka an khel ṭha takzet a, Three Lions hian champion lai France lakah inkhel thunun thei hial mah se a pawimawh ber goal an khung hleithei lo miau a, a tlawm zawkah an ṭang.
France lam hi khel hmuhnawm tawk lo mah se hun pawimawhah world champion an nihna a lang a, an rilru a paukhauh a, an huaisen a, an thawkrim bawk - a bik takin kum 36 mi Giroud fak a phu.
Karim Benzema inhliam vang chauha first choice dinhmun luahtu striker hian rintlak a ni tih pholangin goal a khung leh ta a, tun World Cup-ah goal li a khung - France striker ropui zingah lam hmaih a thiang tawh lo.
Kylian Mbappe chanchinin sawi hlawh mah se Griezmann chu player langsar a ni bawk. Atletico Madrid forward hian goal khung lo mah se an goal hnih chu a assist ve ve a ni a, France tana a ṭangkaizia hmuh turin a la awm reng.
A zawna world champion nih tumin France an kal zel e.
He team hian nasa takin hma kan sawn - France ang team ṭha beih tawk kha kan duh a ni a, chutiang tak chuan kan ti. Kan khel ṭha ka ti a, ka player-te kum zat en ula, hmabak êng tak kan nei, tih in hre thei ang.
Zanin kha ram ṭha tak kan hmachhawna kan khelh ṭhat ber pawl a ni hial mai thei. Mahse, a tawpah chuan a tawk zo lo a, scoreline kha a pawimawh ber a ni miau si a ni.
Hetiang ang tournament hautak khelh zawhah hi chuan ngaihtuahna a su kual duh hle a, thutlukna ṭha siam turin hun ka mamawh.
Team, England leh FA tana ṭha ber tur ka ngaihtuah a ṭul a, thutlukna ṭha ber siam ka duh a, chu thutlukna ka siam dawnah chuan thutlukna dik ngei a ni tih hre chunga siam ka duh a ni. Tournament hautak em em khelh zawhah ka ngaihtuahna suk kual dan hi chu ka hrechiang sa a ni. - Gareth Southgate, England manager
*A ban dawn leh dawn lohah thutlukna a la siam lo
England kha team ṭha tak
an ni a, theihtawp chhuahin kan
bei let. Mahse, penalty kan chawi a, a hnua kan chawi nawn leh kha pawi ka ti.
Ka team-ten fak an phu a, kan hlauhawm thei reng tih kan pholang. Kan quality a sang a, kan rilru a paukhauh a, tawnhriat kan nei ṭha bawk.
England khan player naupang tak tak, mahse, tawnhriat nei ṭha, top team-a khel an kawl ṭeuh. Hetiang inkhelah hi chuan thil ho tê hi danglamna thlentu a ni ṭhin a, vanneihthlak takin zaninah chuan
kan duh ang zawkin thil a thleng a ni.
Semifinal-ah France hi ka kaihruai leh dawn a, chumi hnu zel tur chu nakinah kan la hre mai ang - thil zawng zawng ka hre lawk bik lo a, thil dang chu nakinah a la ngaihtuah theih a ni. - Didier Deschamps, France manager