Inkhel hmuhnawmah Argentina an chak
Lionel Messi awmna Argentina leh Netherlands te inkhel boruak san vanglai khan Inrinni zing lam a ni tawh a, tun World Cup khelh laia match hnuhnawm bera chhal ngam a nih avangin Mizoram aṭanga entute pawh kan mut a chhuak lo tlang chu a nih kha.
Goal hnih an khung hnuah Argentina lamin goal hnih bawk an chhuah a, 2-2 niin inkhel a tawp. Extra time khelh zawh hnuah pawh goal dang a lut zui lo, penalty shootout hmanga chak zawk zawn niin South American ram hi 4-3 in an chak.
La Albiceleste hian semifinal-ah chuan Brazil hnehtu Croatia an tum leh dawn, player ropui bik Messi-a'n World Cup nomawi chawi turin match hnih chak a la mamawh, kawng awlsam erawh a ni dawn bik lo.
A hmuhnawm
Lusail Stadium-a inkhelah boruak a sang, football thiam ram pahnih an nih avangin an inveng uluk tawn hle. Virgil van Dijk leh a ṭhian ten hun rei tak chhung chu Argentina hmatawng an dang thei, mahse an inveng reng thei lo.
Argentina captain Messi-a'n amah vengtu player pali karah ball ṭha bik a la pe chhuak thei tho a, wingback Nahuel Molina tan siamsakin, ani hian chawlhlawk hma minute 10 la awmnah goal hmahruai a khung, a siamsaktu tluk zetin Molina khan a ti ṭha.
Lionel Scaloni-a'n thutlukna danglam a siam, a la tih ṭhan loh dan takin tlarhnungah player pathum a dah. Nicolas Otamendi leh Cristian Romero te bakah Lisandro Martínez te an ding, a sirah Molina leh Marcos Acuna te a dah bawk.
Argentina coach hian thutlukna a siam dik, a wingback pakhat Molina-a'n goal a khung bakah, mual sir lehlama awm Acuna chu Denzel Dumfries-a'n titluin penalty a hlawh chhuak, a pettu Messi kha keeper 6ft 8in a sang Andries Noppert hmaah a zam lo, a khung chiang hle.
A la tawp lo
Louis van Gaal tan 'risk' lak a ngai, leia ball inpekah Argentina an tluk lo tih a hria, 6ft 6in a sang Wout Weghorst a dah lut. Burnley aṭanga Besiktas lama loan hmanga khel lai an dah luh hnuah Dutch team lamin ball an vawrh luah luah.
Netherlands hian ball kang hmangin Argentina tlarhnung an chhaih buai hneh hle, minute 83-naah Weghorst chuan a tauh lut ta nge nge, keeper Emi Martinez tan dan hman a ni tawh lo. Van Gaal-a naute an phur a, sut tumin an bei zui.
Fing takin freekick an pet a, defender ten ball kang an chan ṭhup laiin a lirin an pet daih. Weghorst bawkin dawngin, kum 30 mi striker hian hmun chep takah thluak fim hmangin a ball dawn chu laklawh nei miah loin a khung, an sut zo der.
Van Gaal-a'n thutlukna a siam dik a, huaisen taka beiin si phurh an sut zo, hun pek belhah goal khung aiin a venhim an ngai pawimawh leh ta zawk a, an keeper Andries Noppert hoin penalty pet an cho tih a lang.
Penalty boruak
Argentina keeper Emi Martinez-a'n Virgil van Dijk leh Steven Berghuis te penalty pet hmasa pahnih a dansak a, a hnathawh tur ang chin chu tlin takin a thawk nghalah a ngaih theih - Messi leh Leandro Paredes ten khungin an dinhmun a ṭha nghal viau.
Mahse, Argentina tana rawn pen chhuak palina Enzo Fernandez-a'n penalty spot a pan dawnin Dutch player lamin boruak an lo siam a, kum 21 mi Fernandez hian boruak a zo lo hret, goal ban hrulah pet chhuakin Netherlands beiseina a siamsak.
Amaherawhchu, extra time khelh laia hun ṭha bik vawi hnih hlahtu Lautaro Martínez erawh a zam ve eih lo. Copa America an champion dawn pawha penalty pet ngamtu hian keeper Noppert bumin chakna goal a khung.
Argentina player dang ten chakna goal khungtu striker Martinez lam an pan a, captain Messi erawhin penalty vawi hnih dangtu keeper Martinez lam a pan a, player dang tana sulsutu leh hna hautak thawhsaktu a ngai pawimawh thiam hle.