Brazil an lam ta lo - Croatia an ngam lo!

World champion ni tura beisei kai zinga mi, team ropui leh ṭha Brazil World Cup zinkawng chu tihtawp a ni a, an goal khung apiang lam chunga an lawm ṭhin avanga sawisel tawk Selecao hi tun World Cup-ah chuan an lam tawh dawn lo.

Zirtawpni zan khan Brazil hian Croatia lakah Neymar-a goal mawi bik hmangin minute 105+1-ah goal an khung a, goal luh hun leh Croatia tlarhma thlirin an tlang tawh mai dawn niin a lang hman.

Mahse, beidawng ve duh lo Croatia-in a kaw tawpa nawr an nih tawh chuan chak an tum ngam tih pholangin, Bruno Petkovic hmangin si phurh sutna goal an khung a, hun tawp thlenga goal dang a luh loh avangin 1-1 a ni.

Penalty hmanga chak zawk zawn zui a ni a, Croatia tana pettu ten an pet goal vek laiin Brazil tan Rodrygo leh Marquinhos ten an chhuih goal ve lo a, 4-2 in Croatia an chak.

Tuma chiang
Croatia coach Zlatko Dalic-a'n âtthlak taka Brazil nena an inkhel thunun a tum lo a, goal nawr chiam ai chuan anmahni lamah Brazil tlarhma ṭha rual lam phei tur dan chu an tih tur a ni tih a hrechiang.

Brazil tan midfield-ah Casemiro leh Lucas Paquetá awm mah se midfield-a roreltu chu Croatia thiampuipa Luka Modric a ni a, Selecao-in midfielder pahnih lek an hman avanga hmun awl chu Marcelo Brozovic leh Mateo Kovacic te nen rorel nan an hmang.

Croatia tana player langsar ber chhal ngam erawh Dominik Livakovic a ni a, Dinamo Zagreb keeper hian khawvela forward ṭha ber ber a hmachhawn chungin goal a chhuah duh lo - vawi 11 ngawt save a nei!

Kum 27 mi keeper save zat hi tun World Cup-a match khata save nei hnem ber record a ni a, a nep lo hle. Mahse, tlarhma lamah Croatia-in Brazil an rum ṭhaih meuh lo a, an tum ber goal venhim a nih miau avangin minute 90 chhung erawh an tumah an hlawhtling tiin a sawi theih.

A rei si lo...
Brazil-in Neymar an nei miau a, ani ang player ṭha bik kawl chuan dan chah reng theih a ni lo - extra time chawlhlawk an hmang ṭep tawh tihah Neymar a rawn inlar a, Paris Saint-Germain forward hian goal a rawn khung.

Kum 30 mi forward goal khung hi goal mawi bik a ni a, ama thawhchhuah liau liau a ni bawk - hun harsaah player ṭha danglamna a lang a, Brazil hian harsatna nei loin hnehna an chang mai dawn niin a lang tawh.

Mahse, Croatia lamin ngaihdan dang an nei a, Brazil hi awlsam taka semifinal luhtir mai an tum lo - hun tawp nan minute thum chiah a awm tawh tihah goal zawna an shot hmasa ber an nei a, mahse, a goal lawi si!

Bench aṭanga luhtir Petkovic-a'n goal ṭha bik khungin, a team a chhanhim a, Croatia an sapatal a ni ber - Brazil tan goal dang khung leh turin hun a awm tawh lo a, penalty hmanga chak zawk zawn niin Croatia an chak a, Brazil an thawn haw.