Neymar a chawl mai thei!

Champion beisei laiin semifinal tak ngial pawh an thleng zo lo a, Brazil chhuanvawr leh an thiampuipa Neymar chuan ram tana inkhelh a chawlhsan mai theih thu a sawi.

Kum 30 mi Neymar chuan, "Ngaihtuahna sen ṭhat leh ka mamawh a ni," a ti a, Paris St-Germain forward chuan, "National team tan kawng ka khar hran lo a, mahse, ka lo kir leh ang tih pawh 100% in ka sawi ngam chuang lo," a ti.

Neymar hian Brazil tan match 124-ah goal 77 khungin, Brazil tana goal khung hnem ber Pele record a nih rual a, mahse, tun dinhmunah chuan Pele tana khel chhunzawm turin thathona a nei rih lo niin a lang.

Santos aṭanga a hming chhertu Neymar chuan, "Ngaihtuahna sen ṭhat ka mamawh a, ka tan leh ram tana ṭha ber ka ngaihtuah a ngai. Hrehawm ka ti takzet a, World Cup hnuhnung zawka thil thleng ai khan hrehawm ka ti," a ti a, kum 2018 quarterfinal-a Belgium an ngam loh aia hrehawm a tih thu a sawi.

Neymar hian World Cup vawi thum a khel tawh - kum 2014-ah khan semifinal lut mah se, Germany lakah 7-1 zetin an mualpho a, hemi ṭum hian hliam vangin a inlan lo a, World Cup 2018 quarterfinal-ah Belgium ngam loin an tla bawk.

Khawvela footballer man to ber Neymar hian Brazil tana inkhelh a chawlhsan a nih chuan, Selecao hi nomawi liantham chawipui nei miah loin a mangṭha dawn tihna a ni.

Brazil hian kum 2019 khan Copa America nomawi chawi mah se hliam vangin Neymar a inlan thei lo a, kum 30 mi forward hi a vannei tawk ṭhin lo ve bawk.