Tite-a'n Brazil a thlah ta

Croatia laka an tlawm hnu lawkah Brazil coach Tite chuan a hna a bansan thu a sawi a, kum 61 mi coach hian, "Thlamuang takin Brazil coach hna chu ka kalsan dawn ta a ni," a ti a, Selecao a enkawl chhunzawm loh tur thu a sawi.

Tite hian World Cup ṭan a nih hma khan eng result pawh nei se, Brazil coach aṭanga a chawlh tawh tur thu a lo sawi tawh a, a sawi ang ngeiin thutlukna a siam.

Corinthians boss hlui chuan, "Result duhawm lo tak a ni a, na ka ti. Mahse, thlamuang takin he hmun hi ka kalsan dawn a, a hun chu a tawp ta," a ti a, Brazil enkawl chhunzawm a tum tawh lo.

Tite chuan, "Kum khat leh a chanve liam taah khan ka ban tur thu hi ka sawi tawh. He hmunah hian hnehna chang a, 'Ka cham leh si dawn,' ti tura kal pawh ka ni lo - min hrechiangtuten min hria ang," a ti a, a thutlukna siam tawh a sawh sawn ngai loh thu a sawi.

South American Champions League-a Corinthians lo champion pui tawhtu Tite hian kum 2016 aṭang khan Brazil hi a enkawl ṭan a, World Cup ṭum hnih enkawl mah se quarterfinal aia sang a thleng lo ve ve.

Hetihrual hian kum 2019 khan Neymar tel loin, Copa America-ah erawh Brazil hi champion nomawi a chawipui a, match 81 a kaihhruaiah vawi 61 hnehna chanpuiin, vawi sarih an tlawm.

Tite-a'n record ṭha pangngai tak nei mah se, Brazil enkawltu a ni miau a, World Cup vawi hnih enkawl chunga quarterfinal bak pelh loh hi result ṭha tia chhalsak a harsa.

Kum 2015-a Brazil Serie A coach of the year ni thei Tite chuan, "Chhunzawm tur sulhnu ropui ka hnutchhiah em, ka hre lo a, hunin a la hril ang chu. Tun dinhmunah chuan kan hnathawh zawng zawng thlirlet turin hun ka nei lo.

"World Cup aṭangin petchhuah kan ni a, mahni hnathawh en let thei dinhmunah ka ding lo," a ti a, Croatia laka an tlawmna chu a la na hle.