Chanmari FC-in MPL an khel zel dawn

Mizoram Premier League-a sulhnu nei ṭha ber zinga mi Chanmari FC chuan Inrinni khan an theihna tak an pholang a, MPL Playoff-ah Sihphir Venghlun FC chu 6-2 in an sawp. MPL vawi hnih champion tawh Chanmari hi aggregate-ah 7-3 in an chak a, Mizoram chhunga football inelna sang ber an khel chhunzawm zel ang.

MPL Playoff second leg hi RG Stadium-ah khelh a ni a, minute 10 chhung lekin Chanmari FC-in goal athum an khung an vangin an hna a awlsam. Chanmari tan K. Roluahpuia, H. Lalmuankima, Lalnuntluanga, Lalnunzira Sailo leh Alex Ramdinthara ten goal khat ṭheuh an khung a, Siphir Venghlun player Lalrodawngkima'n an lamah a tilut bawk.

Sihphir Venghlun tan PC Lalruatsanga'n goal hnih khung ve mah se scoreline timawitu chauh a ni a, 6-2 in an chak lo. First leg-ah 1-1 team pahnih an inhnehtawk a, second leg-ah 'budget' sang zawk Chanmari FC danglamna a lang.

Beisei pha lo
Chanmari FC hi MPL9 ṭantirh khan champion tura rinkai an ni pha hial a, round hmasa berah Aizawl FC nen chiah point thum an hlawhchhuak. Amaherawhchu Chanmari hian beisei an pha lo chhunzawm a, round 5 zawha a sang pali an chhuahsan hnuah semifinal khel pha thei chinah an awm tawh lo.

Champion rinkai ni phak kha season tawp dawn meuh chuan tla thei dinhmunah an ding a, round 12 zawh aṭangin table mawngphahah an awm. MPL vawi hnih champion tawh team hi relegate thei dinhmunah an ding a, mahse match tawp berah an elpui FC Bethlehem hnehin playoff khel pha chinah an awm hram.

Chanmari FC tan playoff hi harsa turin lang lo mah se first leg-ah 1-1 in an inhehtawk. Playoff-ah away goal rule hman a nih avangin an dinhmun a derthawng hman a, mahse a hunah tak Chanmarians rawn tho chhuakin MPL an khel chhunzawm ang.

MPL khel tur
MPL qualifier aṭangin Kolasib club Project Veng FC an inpetling a, playoff-ah Chanmari FC-in hnehna changin MPL an khel zel dawn. MPL 10 khel tur club pariat a chiang ta.

Season thara MPL khel turte chu kumin champion Chawnpui FC leh I League club Aizawl FC bakah FC Venghnuai, Chhinga Veng, Mizoram Police, Electric Veng FC, Chanmari FC leh Project Veng FC te an ni.

MPL Playoff
First Leg - December 8, Ningani
Chanmari FC 1 - 1 Sihphir Venghlun FC
CFC: Lalremruata 27'
SIH: Dinsangliana 83'
Second Leg - December 10, Inrinni
Sihphir Venghlun FC 2 - 6 Chanmari FC
SIH: PC Lalruatsanga 31', 84' (P)
CFC: K. Roluahpuia 1'; Lalrodawngkima 9' (OG); H. Lalmuankima 10'; Lalnuntluanga 47'; Lalnunzira Sailo 55'; Alex Ramdinthara 90'
Aggregate-ah Chanmari FC 7-3 in an chak