Ten Hag-a'n Ronaldo thlakna tur lakluh ngei a tum

Manchester United manager Erik ten Hag chuan January transfer-ah Cristiano Ronaldo thlakna tur striker lakluh ngei a tum. FIFA World Cup laiin Man United hi Spain-ah training an nei a, friendly match-ah Cadiz (4-2) a an hneh loh hnuah Pathianni khan Real Betis (1-0) an hneh lo leh bawk.

Dutch manager Ten Hag hian Ronaldo hi chelh duh mah se Piers Morgan-a'n a kawm ṭuma a thusawi avangin chhuahtir mai loh chu thutlukna siam theih an neih loh thu a lo sawi tawh. Man United manager chuan, "Kan mamawh player kan lak theih nan theihtawp kan chhuah. Player mimal hming sawi chu a rem lo. Player hian contract an neih avangin kan zahsak a ngai a, an hming ka lam ri dawn lo. Mahse, uluk takin kan zirchiang a, kan hun ṭha neih hi hman ṭangkai ngei kan tum," tiin a sawi. FIFA World Cup-a che ṭha Gonçalo Ramos leh Cody Gakpo te nen United hi an sawizawm.

Man United hian nipui bazarah Antony, Casemiro leh Lisandro Martinez te lalutin sum ṭhahnem tak hmang mah se an player zinga hlawh tam ber Cristiano Ronaldo a chhuah avangin player lakna tur sum an nei. Chutihrualin January transfer-ah hi chuan player lak a har ṭhin a, Man United-in an duh zawng player an la thei ang em tih chu hunin a hril ang.