Crawford-a'n WBO welterweight title a humhim

Pathianni khan Terence Crawford chuan WBO welterweight world title hum turin an khua Omaha, Nebraska-ah David Avanesyan chu a hneh. American southpaw Crawford hian round ruknaah Russian boxer Avanesyan chu a knockout.

Crawford hian kum 2018 khan WBO welterweight world title hi a kawl ṭan a, hemi hnu hian vawi ruk inhnek leh tawhin a title hi a hum vek. Hei chauh hi a ni lo, Crawford hian vawi 39 a khingpui hneh tawhin chak loh a la nei lo.

Kum 35 mi Crawford elpui thei ber tura ngaih chu Errol Spence Jr a ni a, American boxer Errol hi kum 32 mi niin vawi 28 a inhnektawhah a la chak vek. Kumin khan Crawford leh Errol te inhnek theih dan tur hi zawn ni mah se a hlawhtling ta lo - nakkum lamah thleng ngei se tih hi boxing ngainatute beiseina a ni.