Chhara goal-in awmzia a nei phak lo
NorthEast United tan Rochharzela'n goal khung mah se Chennaiyin lakah a team chu hnehna a chanpui zo chuang lo a, an mikhual team lakah hian 7-3 in an tlawm.
Highlangder hian coach thar Vincenzo Annese hnuaia an match hmasa ber an khel a, tlarhmaah hmasawnna hmuh tur a awm laiin tlarhnung erawh ṭan tichhuak mai an la ni.
Chennaiyin tan Dutch winger Abdenasser El Khayati chuan hattrick a siam a, Petar Sliskovic chuan goal hnih khungin, Julius Duker leh Joe Zoerliana (own goal) ten goal khat ve ve an khung bawk.
South Indian club-in 1-0 a hma an hruai laiin Highlander tan Wilmar Jordan chuan penalty aṭangin si phurh sutna goal a khung a, Chennaiyin lam hian goal ngain an thungrul leh zui!
NorthEast tan French winger Romain Philippoteaux leh Chhara ten khung ve leh mah se Joe-a'n an lamah a tih luh bawk avangin 7-3 in Chennaiyin an chak.
Zirtawpni zan khan Hyderabad FC chuan 2-0 in East Bengal an hneh a, Mohammad Yasir leh Javier Siverio ten goal khat ve ve an khung - Lalchungnunga leh Jerry Lalrinzuala ten bul an ṭan.
Inrinni zan inkhel hmasak zawkah FC Goa chuan 3-0 in Odisha FC an hneh bawk a, Brison Fernandes, Noah Sadaoui leh Alvaro Vazquez ten goal khat ṭheuh an khung - Odisha winger Nandhakumar Sekar chu minute 65-naah a yellow card pahnihna avangin hnawhchhuah a ni a, goal hi player 10 an nih hnua an chhuah vek a ni.
Odisha tan hian Jerry Mawihmingthanga leh Lalruatthara ten bul an ṭan a, Isaac Vanmalsawma chu bench aṭanga luhtir a ni bawk - Goa tan Ayush Chhetri a inlan bawk.
December 9, Zirtawpni Zan
Hyderabad FC 2 - 0 East Bengal FC
HFC: Mohammad Yasir 38'; Javier Siverio 85'
December 10, Inrinni Zan
FC Goa 3 - 0 Odisha FC
FCG: Brison Fernandes 74'; Noah Sadaoui 78'; Alvaro Vazquez 90'
NorthEast United 3 - 7 Chennaiyin FC
NEU: Wilmar Jordan 36' (P); Romain Philippoteaux 73'; Rochharzela 90+5'
CFC: Abdenasser El Khayati 11', 40' 48'; Petar Sliskovic 45', 57'; Julius Duker 68'; Joe Zoerliana 79' (OG)
Nizan Inkhel (Result kan hre hman lo)
Kerala Blasters 7:30 PM Bengaluru FC