Player 10-a khel chungin Aizawl FC-in point hlawh chhuak

Nimin khan Deccan Arena, Hyderabad-ah Aizawl FC-in Sreenidi Deccan FC an hmachhawn a, Mizo club hian player 10-a khel chungin point hat hlu tak an hlawh chhuak. Mizo club hi hun pekbelhah 3-2 in an hnufual a, keeper Vikram Singh hnawh chhuak a ni bawk. Mahse, Aizawl FC an beidawng duh lo a, Emmanuel Makinde-a'n hun pek belh belh minute 11-naah siphurh sutin 3-3 in inkhel a tawp.

Mizo club hi coach thar Caetano Pinho hnuaiah a vawi khat nan an khel a, Mizo player pariat captain Lalchhawnkima, Zodingliana Ralte, K. Lalmalsawma, Lalchhanhima Sailo, Lalramsanga, R. Lalthanmawia, K. Lalrinfela leh R. Ramdinthara ten bul an ṭan.

Sreenidi Deccan lamah Ramhlunchhunga'n bul a ṭan a, mualneitu hian bul an ṭan ṭha zawk. Minute ngana lekah striker chhuanvawr David Castaneda Munoz chuan Chhawnkima leh Adinga te venna aṭanga tal putin ṭha zetin a pet goal.

Aizawl FC an insiamrem nghal a, minute riatnaah vei lam aṭanga Amawia cross chu Tharpuia'n a tauh goal. Mizo club an che ṭha chhunzawm a, Ramsanga'n hla tak aṭangin freekick a pet per. Minute 29-naah Mafela ball pek chu Henry Kisekka-a'n a tlawh luh a, Aizawl FC-in 2-1 hma an hruai.

Mizo club an ṭang tluan thei lo a, minute 43-naah David Castaneda Munoz-a'n kawh zetin a pet goal a, first half-ah 2-2 a ni. Inkhel a nung ṭha a, second half-ah Rosenberg Gabriel-a'n Tharpuia a nam thlu. Team pahnih an buai a, captain Chhawnkima'n a naute a chhan na hle.

Injury time-ah Sreenidi Deccan tan substitute Songpu Singsit chuan a ti goal a, Aizawl FC player-ten a kutin a beng lutah an ngai. Thil thleng hmuchiangtu AFC keeper Vikram-a'n referee lakah a lungawi lohna a lantir rei hret avangin hnawhchhuah a ni.

Mizo club an vanduai turah ngaih theih mah se an beidawng duh lo a, an vanneih phah. Hun pek belh minute 11-naah Adinga freekick vawrhluh chu keeper Aryan Niraj Lamba-a'n a man sual a, hemi per hi substitute Emmanuel Makinde-a'n a khung. Goal luh belh theihna hun a awm tawh lo a, 3-3 in inkhel a tawp.

December 10, Inrinni
Sudeva Delhi 0 - 2 Churchill Brothers
CCB : Abdoulaye Sane 54'; Lamgoulen Hangshing 76'
December 11, Pathianni
Sreenidi Deccan 3 - 3 Aizawl FC
SRE : David Castaneda Munoz 5', 43'; Songpu Singsit 90+3'
AFC : R. Ramdinthara 8'; Henry Kisekka 29'; Emmanuel Makinde 90+11'
Vawiin Inkhel Tur
Real Kashmir 2:00 PM RoundGlass Punjab
Gokulam Kerala 7:00 PM Rajasthan FC