Inkhel boruak a sang

Lionel Messi-a'n hnehna an chan hnuah Netherlands coaching staff awmna lam a hawi a, ngawi turin a ti. World Cup boruak zet zawng a turu a ni, kum 35 mi Messi pawhin a thinurna a thup thei lo.

Inkhel boruak san laiin Leandro Paredes-a'n Dutch team awmkhawmna lamah ṭul lo angreng takin ball a pet nghek a, defender Virgil van Dijk-a'n rawn su tluin pawn lam aṭangin player an rawn tlan lut huk bawk, a boruak chu sang vet vet tak a ni.

Spanish referee Antonio Miguel Mateu Lahoz-a'n yellow card vawi 17 teh meuh a phawrh a ngai, hun tawp dawnah Dutch defender Denzel Dumfries phei chu hnawhchhuah a ni - World Cup match khata card phawrh hnem ber ṭum a ni hial.

Player chauh an ni lo, Argentina coach Lionel Scaloni leh assistant coach Walter Samuel te pawh card hmu zingah an tel, Dutch striker Weghorst pawh khan khelmual a luh hmain yellow card a hmu fel hman.

Netherlands tan card hmuh tam kha a pawi tawh lo, an zinkawng a tawp fel. Argentina erawhin semifinal-ah an defender pawimawh zinga mi Marcos Acuna leh bench aṭanga lut pha Gonzalo Montiel te chu hrem vangin an chhawr theih loh phah dawn a ni.