Van Gaal hun hnuhnung

Netherlands coach Louis van Gaal chuan Argentina an hneh loh hnuah team enkawl hna a thawh chu a chawlhsan thu a sawi a, kum 71 mi hian an ram team chauh ni loin football team enkawl hna a mangṭha. Van Gaal hi Ronald Koeman-a'n a thlak dawn a, Barcelona manager hlui hian Netherlands leh France ten nakkum March-a Euro qualifier an khelh hunah a enkawl nghal ang.

Cancer natna hneh tawhtu Van Gaal chuan, "Head coach ka ni tawh lo ang, tun tournament hi ka tan chuan a tawpna a ni a, hei hi match hnuhnung ber chu a ni. Team enkawl hna ka thawh lai khan hun hlimawm tak ka tawng.

"Chutihrualin thinlung nat ngawih ngawih chang pawh ka nei, theihtawp tak meuh kan chhuah chung pawha kan chak loh hi hrehawm ka ti. Tun ṭuma ka lo kir lehna bikah match 20 chhung kan tlawm lo kha a ni a, ka naute khan hna ṭha takin an thawk," a ti.

Kum 2021 aṭang khan Van Gaal hian a ṭum thumna atan Netherlands hi a enkawl a, match 14 hnehna changin ṭum ruk dang chu an khingpuite nen an inhnehtawk. FIFA ranking-ah pariatna niin, World Cup semifinal an thlen loh chhan pawh penalty chauh a ni.