Salt Lake-ah Bagan leh Lajong inhnehtawk December 18-ah NorthEast Derby

Ningani zan khan Shillong Lajong-in captain Samuel Lalmuanpuia penalty hmangin Mohun Bagan lakah point khat an hlawh chhuak a, Salt Lake Stadium-a inkhel hi 1-1 in a tawp.

North East state aṭanga I League khel hmasa ber Lajong hian December 18, Thawhṭanni hian RG Stadium, Mualpuiah champion lai Aizawl FC an hmachhawn ang.

Bagan leh Lajong

Mohun Bagan-in inhliam vangin player pawimawh Ansu­mana Kromah leh Sony Norde te an chhawr thei lo a, hei vang hian Lajong player hlui Dipanda Dicka-a'n mawhphurhna a ngah sawt. Minute 12-na lekah Bagan winger Sheikh Faiaz chuan Rakesh Pradhan lakah penalty hlawh chhuakin Bagan striker Dicka-a'n a khung nghal.

Lajong-in Salt Lake-ah Bagan an hlau bik lo a, Zema­bawk North tlangval Samuel-a'n mikhual team goal nawrna kawngah hmun pawimawh changin Mariners defender zingah Ricky Lallawmawma a awm ve bawk.

Minute 72-naah Yemeni attacking midfielder Aiman Al-Hagri chu Bagan defender Kingshuk Debnath-a'n box chhungah a tlawh thlu a, referee-in penalty pe ve lehin Mizo tlangval Samuel-a'n siphurh sut nan a hmang. Hemi hnu lawk hian Aizawl FC defender hlui Eze Kingsley chuan Lajong captain hi a tih tluk avangin yellow card pahnihna a hmu a, hnawhchhuah a ni.

Samuel-a erawh malpui hliam vangin lakchhuah a ni a, Darlung tlangval F. Lalrohlua rawn lutin goal dang a luh belh tawh lo. Bagan coach Sanjoy Sen chuan, "Kan tihsual vanga point thum hmu lo kan ni a, Kinshuk khan ṭul lo takin penalty a chawi a, Kingsley khan fimkhur loh vangin red card a hmu bawk," tiin a player-te fimkhur tawk lo chu a dem hle.

Aizawlah Lajong

Nimin khan Lajong-in Aizawl an rawn thleng nghal a, tlai lamah Lammual an tlawh nghal. Aizawl FC hmachhawn tur zingah hian Mizo tlangval pahnih Samuel-a leh Rohlua te an tel a, Lajong captain hi inhliam vangin a dinhmun a la chiang lo.

Tun dinhmunah Lajong hian vawi li khelh aṭangin point sarih an hmu a, Aizawl FC aiin point thumin an hmu sang zawk. NorthEast Derby hian table-ah nghawng lian tak a neih dawn avangin inkhel pawimawh a ni a, Mizo mipui tan Mizo club ṭawiawm a ṭul ang.