Division 1 Futsal Final-ah Tuikual vs Armed Veng

Mizoram Football Associa­tion buatsaih, Division One Futsal Tournament semifinal chu nimin khan Mini Sports Complex, Armed Vengah khelh a ni a, IDBI ,Tuikual leh T&S Armed Veng chuan final an lut.

IDBI, Tuikual hian an tawnhriat neih ṭhat hmang ṭang­kaiin Vengthar Uinited, Kawnpui chu 10-8 in an hneh. Kawnpui rawlthar hmuhnawm tak takte hian 6-2 in hma an hruai hman a, a tawp dawnah Tuikual lamin an pawt thla leh a ni.

T&S, Armed Vengin in­khel inhnehtawk takah 4-3 in Zonuam Futsal Club an hneh hram. Zonuam hian goal post vawi nga ngawt an tihper bakah hun tawp dawnah own goal an nei a, Armed Veng an vannei ta zawk - Armed Veng lamah hian MPL-a Mizoram Police FC player panga ngawt an awm a ni.

Vawiinah final

Vawiin chawhnu dar 1:00 hian final-ah IDBI Capital, Tuikual leh T&S, Armed Veng an inkhel dawn. Tuikual club hi tualchhung futsal-a tawnhriat ngah an ni a, MPL player ṭhate pawh an kawl. T&S Armed Veng hi MPL player panga nei an nih piah lamah rawlthar ṭha tak tak an nei.

December 15, Semifinal Results
01:00 PM IDBI Capital, Tuikual 10 - 8 Vengthar Utd, Kawnpui
02:00 PM T&S Armed Veng 4 - 3 Zonuam Futsal Club
Vawiin Final
01:00 PM IDBI Capital, Tuikual vs T&S, Armed Veng