Record siamtu City khelmualah Spurs

"Kan rilru puthmang kan la thlak danglam lo tih hi pholan ka duh a, chutianga kan ti a nih chuan fan-te pawhin lungsi takin min thlir reng thei ang. A tam thei ang ber hnehna chan zel kan duh a ni," tih hi Manchester City-in Premier League-a chak zawn rei ber record (15) an siam hnu lawka manager Pep Guardiola ṭawngkam a ni a, City chak tluang lai tih tawp tumtu tur chu Tottenham Hotspur a ni–zanin dar 11:00-ah Spurs hian Etihad Stadium an pan dawn.

Match 15 chak zawn tawh City chelh tum a harsa dawn tih a chiang reng a, Pep-a naute kal fawr lutuk tur chelh thei an awm a nih chuan Spurs tluka thlan nahawm erawh an awm chuang lo–zanin inkhel a hmuhnawm dawn tihna a ni.

Goal khung thiam

Manchester City-in Premier League match 15 a zawna hnehna an channa kawngah goal 49 an khung a, chumi awmzia chu match khata goal 3.26 khung zel ang an ni–a sang vet vet hle. Hetihrual hian City hian goal 10 ngawt an chhuah ve tho a, an tlarhnung a nghing ve fo tihah phat tur a awm lo–Spurs-in tlarhmaah Harry Kane an neih dawn avangin City tan fimkhur a ṭul khawp ang.

City-in league match 15 a zawna hnehna an channa kawngah Sergio Aguero chu an goal khung khawl a ni a, Argentine striker hian goal 10 a khung tawh–Gabriel Jesus leh Raheem Sterling ten goal riat ve ve an khung tawh a, City player zingah match 15 an chak zawnna kawnga goal nga aia tam khung player paruk an awm–Spurs tlarhnung tan hriatreng tur thil a ni.

Team huaisen

City boss Pep Guardiola chuan, "Kan record neih hi chu engtikah emaw a la tawp mai dawn. Record chu thaichhiat tura duan a nih miau avangin. Mahse, English football-a match 15 chhung a zawna chak hmasa ber kan nihna erawh kan rilru huaisen zia pholangtu a ni. Match 15 chhung chuan chet chhiat chang pawh awm ve thei a ni a, mah se kan record en ula, a hunah tak kan rah ṭhin tih pholanna a ni tel bawk," a ti.

Pep chuan Spurs fak nghalin, "Tottenham hi Chelsea nen game hmuhnawm tak pholan duh zinga mi an ni a, team ṭha tak an ni. Anmahni game-a an khingpui hruai luh tum ṭhin team an ni a, Swansea City hmachhawn zawh ni thum hnua tum tur team atan chuan an hautak khawp ang," tiin a sawi.