Arsenal manager a la beidawng lo
Arsene Wenger chuan Premier League nomawi beiseina an la neih thu a sawi. Wenger-a enkawl Arsenal hi league table-ah pasarihna an ni mek a, zanin dar 8:30 hian Newcastle an mi-khual ang.
Gunners hian an match hnuhnung berah West Ham chu goal awm loin an inhnehtawkpui, hmahruaitu Manchester City aiin point 19 zetin an hniam tawh, league match 21 zet khelh tur a la awm avangin thil tam tak erawh a la danglam thei.
Arsenal chunga awm Chelsea manager Antonio Conte leh Tottenham enkawltu Mauricio Pochettino ten nomawi beiseina an neih tlem tawh thu an sawi tawh a, chhiarkawp dan hmangin Arsenal hi champion thei la ni mah se nomawi chawi tur chuan thil mak a thlen a ngai tawh dawn.
Kum 68 mi Wenger chuan, "Miin eng thil nge an sawi hi ka ngaihtuah buai ve ngai lo, kan hna pawimawh ber chu beiseina kan neih chhung a tawp thlenga beih chhunzawm a ni. Inkhel lehpek atan rilru kan pe a, a pawimawh ber chu season tawpah khawi hmunah nge kan awm tih a ni zawk," tiin a sawi.
Arsenal hi pasarihna ni mek mah se palina Tottenham aiin point khat chiahin an hniam a, an dinhmun hi chhe tak a la ni lo. Amaherawhchu, Manchester United lakah huaisen taka khel player-te kha Hammers lakah an thothang a ṭha tawk lo a, khelmual chhunga an chet danah lawmna tur a tam lo.
French manager chuan sawi zawmin, "Table-a kan dinhmun hi kan nihna sawifiah nan a la tawk rih lo, kan hma lawka thil thleng tur Krismas leh January thla hnuah pawh a la danglam duai thei, May thla thleng kan inkhelh dawn avangin tuna beisei kan nei tawh lo a nih chuan inelna huanga tel ve tlak kan ni lo tihna a ni ang," a ti.
Arsenal hian Ham-mers lakah midfielder Aaron Ramsey leh defender Shkodran Mustafi te hliam vangin an chhawr thei lo a, zanin hian Newcastle lakah pawh an la chhawr thei lo ang. A zawna match thum chhung chak ni hmel hmu tawh lo Gunners hian hnehna chan an duh dawn a, chutihrualin an khingpui tur Rafa Benitez naute hi match riat chhuang hnehna chang thei tawh lo an nih avangin chak mamawh pahnih an intawng dawn a ni.