Klopp chhantu chu Neville!

Liverpool manager Jurgen Klopp chu player a siksawi nasat avangin sawisel ni mah se Reds hmelma kumhlun Manchester United leh Everton defender hlui Phil Neville chuan a chhan! Reds hian an match hnuhnung pahnihah Everton leh West Brom an inhnehtawkpui a, Klopp sawiselna a ri ring zual hle.

Neville chuan, "Klopp hian player a khelhtir dan en chuan squad a siksawi hi a ngai miau si a ni. Klopp-a'n a player-te a thlak kual dan hi kei chuan a dikah ka ngai a, Everton lakah pawh khan risk a lak a ngai a ni. Inkhel pumpui kha an thunun a, mah se Everton-in penalty an hlawhchhuah avang chauh khan an vanduai a ni," a ti.

United defender hlui chuan sawi chhunzawmin, "Everton leh West Brom a tum hma zawng pawhin player a siksawi a, result ṭha a neih avangin sawisel a ni lo. Tuna taka sawisel a ni ta thut hi chu a dik lo. December leh January-ah player inhliam a neih loh nan a fimkhur a ṭul a, season hmasaa an talbuaina kha a hre tawh a ni," a ti a, German coach a chhan hle.

Liverpool hian Pathianni zan dar 10:00-ah Bournemouth an lenchilh dawn a, Anfield-a a zawna chak zo tawh lo team lakah Reds fan-ten point thum an beisei tawh ang.