Sindhu-i'n semifinal lut Srikanth zinkawng a tawp

Badminton thiam zual pariatte tana buatsaih Dubai Super Series Finals khelh mekah PV Sindhu chuan a group match hmasa pahnihah hnehna changin semifinal a lut a, mipa singles lama India beiseina Kidambi Srikanth erawh a zinkawng a tawp thung.

World number 3 Sindhu hian Ningani khan a match hnihna khelin Japan nula Sayaka Sato lakah hnehna chang turin harsatna a tawk lo, Rio Olympic silver medalist Sindhu hian minute 36 chhung lekin 21-13, 21-12 in hnehna a chang–a match hmasa zawkah world number 9 Akane Yamaguchi a hneh tawh bawk.

Kum 22 mi Sindhu hian a group match hnuhnung berah Akane Yamaguchi a hmachhawn leh a, he thu buatsaih lai hian result kan hre hman lo; player pahnih te hian semifinal an luh chian tawh avangin an result hian kawngro a su tawh lo a ni.

Mipa singles Group B-ah Srikanth chu a match hmasa berah world number 1 Viktor Axelsen lakah a chak lo a, Ningani khan Chinese Taipei shuttler Chou Tien Chen lakah 18-21, 18-21 in a tlawm leh avangin group stage paltlang beiseina a nei thei tawh lo.