Pune chak lo mah se Isaac a langsar

Ningani zan Indian Super League inkhelah Pune City tan Isaac Vanmalsawma chu hliam vangin chawlhlawk hmaa lakchhuah ngai mah se khelmuala minute 39 hun a hman chhungin Hnahthial rawlthar a langsar a, Emerging Player of the Match leh Winning Pass of the Match chawimawina pek a ni.

Shree Shiv Chhatrapati Sports Complex Stadium, Pune-a inkhelah mikhual team Bengaluru-in 3-1 in hnehna an chang a, ISL-a an season hmasa berah Bangalore club hian league table hmahruaitu nihna dinhmun an luah chhunzawm zel.

Pune hian minute 35-na lekah goal hmahruai an khung a, Isaac-a'n duhthusama ṭha ball a thlawh phei chu Adil Khan chuan mualneitu goal hmahruai ni turin a khung.

Chawlhlawk hman a nih hmain Pune-in an hmahruaina chhunzawm turin hun ṭha an nei a, mah se Jonatan Lucca corner aṭanga Diego Carlos ball pet ṭha tak chu keeper Lalthuammawia Ralte-in a thiam tawk a ni tih pholan nan ṭha zetin a lo dan sak.

Minute 56-naah Pune forward Baljit Sahni chu a yellow card pahnihna a hmuh avangin hnawhchhuah a ni a, inkhel kalphung a danglam nghal. Bengaluru tan an striker chhuanvawr Miku chuan goal hnih a khung a, hun tawp dawnah captain Sunil Chhetri chuan goal khat khung ve bawkin Bangalore club an chak chiang hle.

Mimal Lawmman
Moment of the Match Miku, Bengaluru FC
Winning Pass of the Match Isaac Vanmalsawma, Pune City
Fittest Player Udanta Singh, Bengaluru FC
Emerging Player Isaac Vanmalsawma, Pune City
Hero of the Match Miku, Bengaluru FC
Zanin Inkhel Tur
Delhi Dynamos 8:00 PM FC Goa
Pathianni Zan, December 17
Bengaluru FC 5:30 PM Chennaiyin FC
Mumbai City 8:00 PM Atletico de Kolkata