RG Stadium, Aizawlah NorthEast Derby

Aizawl FC-in vawiin tlai dar 2:00 hian RG Stadium-ah Shillong Lajong an mikhual dawn a, an khingpui tur hi North East aṭanga I League club hmasa ber an ni a, mualneitu hi India hmarchhak aṭanga champion hmasa ber an ni thung.

An intawn hnuhnun ber chu kumin April 30 kha a ni a, Shillong-ah champion zawnna neih a ni a, Aizawl FC-in Mizoram chanchina chhin­chhiahtlak an zuk hnut­chhhiah. Mizo club hian tun season-ah nomawi chawi nawn an tum a, amaherawhchu club dang hausa zawkin coach Khalid Jamil bakah an player ṭha tam zawk an chhuhsak a, Mizo mipui chiah an hmachhuan an ni ta.

Aizawl FC-in coach Paulo Meneses hnuaiah team thar dinin RG Stadium-a an match hmasa berah Churchill Brothers an hneh hram a, Portuguese coach hian mipui tam zawk a beisei.

Lajong hi...
Shillong Lajong pawhin AFC ang thoin team thar an din a, coach atan youth team enkawl ṭhintu Bobby Nongbet an hmang. Mizo tlangval Samuel Lalmuanpuia chu captain a ni a, Darlung rawlthar F. Lalrohlua chu tun ṭumah hian a rawn zin tel ve bawk.

Lajong hi Aizawl FC ang thoa mahni mual hmang thiam an ni a, tun season-ah team thar Gokulam Kerala (1-0) leh Churchill Borthers (2-0) te chu an mualah an hneh tawh. Khualmualah erawh East Bengal lakah 5-1 zetin an mualpho a, amaherawhchu an match hnuhnung berah Kolkata club lian dang Mohun Bagan nen 1-1 a an inhnehtawk avangin inrintawkna an nei let ang.

Mariners nena an inkhelh ṭum hian captain Samuel chu inhliam vangin lakchhuah a ni a, Zemabawk North tlangval hi Lajong coach Bobby Nongbet chuan, "A dinhmun chiang takin ka la sawi thei lo a, duhthlan tur zingah erawh a awm ang," tiin a hliam dinhmun a sawi.

Samuel-a a awm lo a nih chuan Yemeni midfielder Aiman Al-Hagri chu tlarhmaa sawn hma theih a ni dawn a, midfield-ah club chherchhuah kum 17 leka upa Samuel Lyngdoh Kynshi a hman theih ang.

ZoFooty statistics aṭanga thlir chuan Aizawl FC hian Churchill an hneh ṭumin vawi 327 zet in pass dik an neih bakah 72% ball an chang a, hei vang hian coach Bobby-a'n midfield thuam chak thlangin defensive game a khel ve thei bawk.

AFC kulhpui
Aizawl FC tan RG Stadium hi an kulhpui tia chhalh theih a ni a, season liam ta khan Bengaluru FC an draw tih loh chu an chak vek. Mizo club-in league match bika an muala an chak loh hnuhnun ber chu April 11, 2016-a Salgaocar an hneh loh daih tawh kha a ni.

Mizo club-in an mualah record ṭha an chhunzawm thei dawn a, chumi atan chuan chanchin lawmawm a awm. Lajong an hmachhawn hnuhnun bera goal khungtu William Lalnunfela leh Romanian midfielder Andrei Inonescu ten Inrinni khan training an zawm tawh a, David Lalrinmuana erawh inhliam vangin a inlan theih a rinawm loh.

Andrei hian MPL-ah match sarih inkhel bul ṭanin goal hnih a khung bakah assist vawi thum a nei a, statistics hian khelmual chhunga a ṭang­kaina a la phawkchhuak pha lo - inkhel tidanglam thei player a ni. AFC match hnu­hnung bera chakna goal khungtu erawh Yugo Kobayashi a ni.

Aizawl FC coach Paulo Meneses chuan, "Chak tumin theihtawp kan chhuah ang. Lajong hi kan zir uluk a, mipui puihna nen result ṭha neih ngei kan tum," tiin Vanglaini a hrilh.

Lo kal ru...
AFC coach Paulo chuan, "India champion kan nih avangin team zawng zawngin min hneh an chak a, a harsa em em vek a ni. Lajong hi ka hrenchiang a, team ṭha tak an ni. Mahse, duhthusama ṭhain training kan nei thei a, hneh tumin kan khel ang. Churchill Brothers ang khan mipuiin min ṭawiawm ka beisei a, minute 90 chhung mi au phur tura lokal khawm turin ka sawm a ni," tiin fans a sawm.

Lajong-in match li an khelh tawhah Samuel-a'n assist pahnih leh goal hnih a nei tawh a, kum 19 mi lek niin captain a ni bawk. Shillong club coach Bobby chuan, "Player naupangte ni chungin ṭhiante tana entawn tur nih a tling a, kan club a hre chiang em em bawk. Player theihna sang tak nei, Mizo mai ni lo, hmarchhak footballer-te tana entawn tlak a nih avangin captain-ah ka ruat a ni," tiin Mizo rawlthar chungchang a sawi a, Samuela telin team ṭha zawk an nih thu a sawi.