Most Promising Athlete atan Jeremy
Mizo rawlthar ritchawi chak Jeremy Lalrinnunga chu GoSports Foundation Award 2017-ah Most Promising Athlete atan thlan a ni. Zirtawpni zan khan Bengaluru-ah he chawimawina hi hlan niin Tokyo Olympic lo awm tura infiammi beiseiawm leh tuna an thlen china ti ṭhate tan chawimawina hi pek a ni.
Gosports Foundation hian Jeremy hi kum 2020 thleng a zirna, ei leh in bakah thuamhnaw thlengin an tumsak vek dawn.
Govt. Complex rawlthar Jeremy chuan, “A tir aṭanga min kaihruaitu coach Malsawma Khiangte (SYS) leh Zote-a te chungah ka lawm a, he chawimawina ka dawn theih chhan hi thawhrim vang chu ni mah se a bul ber chu Pathian vang a ni. Ka chhung ten min tuipuina avanga hun ṭha nei thei ka ni bawk,” tiin Vanglaini a hrilh.
Indian Weightlifting Federation kaihhruaina hnuaiah Jeremy hi kum 2020 Olympic atan training pek mek an ni a, kum thar January thla hian Senior National Games a khelh dawn bakah April thlaah Junior Asian Championship a khel ang, Asian Championship hi Youth Olympic a inlan thei tur zawnna a ni nghal dawn a ni.