East Bengal tan Danmawia

Barasat Stadium-ah Inrinni khan East Bengal-in Churchill Brothers chu 3-2 in an hneh hram a, Kolkata club tana goal khungtu zingah R. Laldanmawia a tel a, bench aṭangin Brandon VL Remdika a lut bawk.

I League champion tura rinkai zinga mi East Bengal chu Aizawl FC laka tlawm hlim Churchill lakah an talbuai a, Goan club hian Peter Omoduemuke hmangin minute 16-naah goal an khung hmasa a, he goal hi Danmawia hmangin Red and Gold hian an sut. Mualneitu tan Willis Plaza a che ṭha zui a, Trinidadian forward hian first half tawp hmain hmahruaina goal a khung a, he goal hi Nicholas Fernandes hmangin Churchill-in minute 60-naah sut mah se Plaza hian injury time minute sarihnaah chakna goal a khung.

Kolkata club hian match li khelhah point sarih hmuin pathumnaah an invawrh chho a, hmahruaitu erawh Minerva Punjab an ni. Minerva hian zanin dar 8:00 hian Mizo rawlthar duhawm Edmund Lalrindika awmna Indian Arrows an hmachhawn dawn. Hemi zawh hian Mizoram an rawn tlawh dawn a, December 27, Nilainiah RG Stadium-ah champion tum Minerva leh champion lai Aizawl FC te an inkhel ang.