Club World Cup champion Real Madrid

Khawvel club ropui ber ang hiala chhal theih Real Madrid tan kum 2017 hi kum ṭha bik a ni a, Club World Cup, La Liga, Champions League bakah UEFA leh Spanish Super Cup te chawiin kum khat (calendar year) chhunga an nomawi chawi tam ber ṭum a ni.

Real Madrid ropuina belhchhah tur hian player ropui sa Cristiano Ronaldo bawk a pawimawh a, Portugal captain hian Inrinni zan khan Gremio lakah goal awmchhun a khung a, Spanish club hian a ṭum thumna atan FIFA Club World Cup-ah an champion a, nomawi kawl lai humhim thei hmasa ber an ni bawk.

Final chu

Zayed Sports City Stadium, Abu Dhabi-ah Real-in ṭan phat aṭangin nung takin an khel nghal a, European champion tan Luka Modric leh Ronaldo te chu goal hmaah an hlauhawm a, Gremio lam tana Edilson freekick chu crossbar chung chiahah a kal bawk.

Second half-ah Real chungnung chhunzawmin minute 53-naah Ronaldo chuan yard 25

aṭangin freekick a khung a, Gremio lam wall rem fuh tawk loh a hmang ṭangkai thiam hle. Hemi hnu hian Ronaldo-a goal khung chu ball petu Karim Benzema a offside hman avangin pawm a ni lo.

Nomawi la beisei

Chakna goal khungtu Ronaldo chuan, "Kan hlawhtlinna avangin ka lawm. Mimal leh a team anga chawimawina dawng tur hian ka la phur hle a, nomawi chawi ka châkna hi a la sang chho zelin ka hre bawk. Nomawi chawi hi ka nuam tih ber a ni a, kan la chawi belh ngei pawh ka ring," tiin a sawi.

French manager Zinedine Zidane hian January 2016 aṭangin Real Madrid hi a enkawl ṭan a, kum hnih lek chhungin nomawi pariat a chawi tawh a ni.

Pathumna Pachuca

Final khelh hma hian inelna thlengtu Al-Jazira leh Pachuca ten pathumna an zawng a, Mexican club hian Jonathan Urretaviscaya, Franco Jara, Roberto De La Rosa leh Angelo Sagal te goal hmangin 4-1 in hnehna an chang.

Lawmman

Real Madrid chuan FIFA Fair Play Award an dawng a, midfielder Modric chu adidas golden ball dawng tura thlan a ni. Croatian midfielder Modric hian tun inelnaah goal khung lo mah se Real game siamtu ber a ni.

Spanish club-in match hnih an khelha goal hnih khungtu Ronaldo chuan silver ball a dawng a, Portugal captain hian Mauricio Antonio (Urawa Red Diamond) leh Romarinho (Al-Jazira) te nen goal hnih ṭheuh an khung a. Pachuca pathumna nihpuitu Jonathan Urretaviscaya hnenah bronze ball pek a ni bawk.