Chhinga Vengin final an lut

Mahuma Memorial Cricket Tournament semifinal match hnuhnung zawk chu Inrinni khan khelh a ni a, Chhinga Veng CC chuan final lut turin Kulikawn CC te chu run 47-in an hneh; final-ah hian Chanmarians CC an lut tawh a, Nilainiah champion nih inchuhin club pahnih hi an inhmachhawn ang.

Suaka Cricket Ground, Sihhmuia inkhelah Chhinga Veng an bat hmasa zawk a, an thlang sual lo–over 40-ah wicket kua hlohin run 207 an siam a, target pangngai tak an siam. 3C (Chhinga Veng sawina) tan hian Samik Das chu player langsar a ni a, Ranji Trophy thlenga tawnhriat lo nei tawh batsman hian ball 93 a hmachhawnah run 86 zet a vaw chhuak–Kulikawn bowler ten an chelh ngang lo.

Kulikawn tan hnehna chang turin ball 240-ah run 208 siam a ngai a, beiseina nei lo an ni lo. Mahse, beisei ang ngawt erawhin Kulikawn tan thil a kal lo–captain leh innghahna batsman Michael Lalremkima chu run hnih chiah a vaw chhuak hman tihin a out a, Vikash a duck out zui. Bowling lamah pawh wicket thum latu Parvez chuan theihtawp chhuahin run 54 rawn vaw chhuak ve bawk mah se a ṭhiante chhan turin a tling tawk lo–over 40-ah run 160 siamin wicket kua an hloh a, run 47-in target an umpha lo.

3C tan batting lamah Samik Das a che ṭha a, bowling lamah Lalhruaimawia Ralte lam hmaih a thiang lo–ani hian over riat a vawmah wicket nga lain run 35 chiah a pe a ni.

Inkhel Result
Chhinga Veng : 207/9 (40)
bt
Kulikawn CC: 160/9 (40)
*Run 47-in Chhinga Veng CC an chak