Premier League thununtu City

Pep Guardiola-a'n khawvel league khelh harsa ber ang hiala an sawi Premier League-ah a club enkawl Manchester City chu club dang chungah a lentir a, club lian leh te an hmaa ding tawh phawt chu an hneh zel.

Inrinni zan khan City-in Etihad Stadium-ah Tottenham Hotspur chu 4-1 ngawtin an sawp. Season liam ta kha chuan Spurs hi champion Chelsea hnaih bertu an ni a, City aiin point riat zetin an hmu tam bawk. Tun season-ah erawh City hi league-ah a zawnin match 16 an chak zawn tawh a, anmahni aia match khata khel tlem Manchester United aiin point 14 lawiha an san tawh bakah anmahni elpha tura ngaih Chelsea, United, Spurs, Arsenal leh Liverpool te chu an hneh vek.

City an par

Man City tan Ilkay Gundogan-a'n minute 14-naah bul ṭanin minute 70-naah Kevin de Bruyne-a'n goal hnihna khungin Raheem Sterling-a'n goal hnih (80', 90') dang a khung belh leh bawk. Goal hniha hma an hruai lai hian substitute Gabriel Jesus chuan De Bruyne penalty hlawhchhuah chu goal-ah a chantir thei lo a, result erawh a danglam phah lo.

Spurs-in beisei an pha lo. February 2016-a Etihad Stadium-a hnehna an chan hnuah khualmualah 'Big Six' tiha chhiar ho khualmualah hneh an la nei lo a, vawi 10 khualmuala an khelhah vawi ruk chak loin vawi li an inhnehtawk. Hun tawpah Christian Eriksen-a'n Spurs tan goal khat khung ve mah se City nena an inkar zau tak chu a pawt zim pha chuang lo.

City-in match hnuhnung pahniha United leh Swansea City an hneh ṭuma player pawimawh David Silva an chhawr lo a, amaherawhchu Kevin De Bruyne-a'n Spanish midfielder ai a awh

zo hle.

Pep ve thung hi

Manchester City boss Pep Guardiola chuan, "Player tinin an ṭhiante an ringtawk vek a, an ngaihdan a sawiin ka pawm sak bawk. Kan inring tawn vek a, ka ngaihdan ka sawiin min zawm sak bawk. Nomawi chawi hi a pawimawh a, kan rin erawh a ṭha thei ang ber khel tura kan inrintawkna hi a ni. Ka player ka rin em em ten ka thu an zawm tluka thilpek hlu hi a awm chuang lo," tiin a sawi.

Club chungah lawmthu sawi chhunzawmin, "Record ṭha tak kan neih theihna chhan chu club vang a ni. Barcelona leh Bayern zawhah City ka enkawl leh a, ka vanneihna chu club hotututen min ṭawiawm ṭha a, ka duh ang player min pe a ni. Club ṭanpuina leh player ṭha tel lo chuan tuna kan hlawhtlinna ang hi a neih theih loh," tiin hming ṭhatna zawng zawng lak a tum lo.