Fak hlawh lo Arsenal leh Chelsea an chak
Premier League champion Chelsea manager Antonio Conte chuan tun hnaia a nauten ṭha taka an khelh chu midangin an ngaihven sak loh thu a sawi a, a chhan lian tak chu hneh loh nei loa Manchester City an kaltluan vang a ni.
Inrinni zan inkhelah Chelsea hian defender Marcos Alonso-a goal hmangin Southampton chu si khat faiin an hneh a, inkhel dangah Arsenal chuan playmaker Mesut Ozil-a goal khat hmangin an mikhual Newcastle United chu 1-0 in an hneh ve bawk.
Fak hlawh lo
Duhthusamin season bul
ṭan lo mah se Chelsea an insiam
ṭha chho zel a, tun hnai an league match hnuhnung 10
aṭangin vawi riat ngawt hnehna an chang thei, point 38 hmuin Manchester United nen an inzat a, an hniam zawkna chu goal difference chiah a ni.
Amaherawhchu, nizan khan United hian West Brom an hmachhawn a, an inkar a la danglam leh thei. Blues leh United te hian hmahruaitu Man City chu point 14 zetin an phak lo tawh a, an tan nomawi humhim a awlsam tawh dawn lo.
Chelsea manager Conte chuan,"Kan kaltluang hian hriat a hlawh lo, a chhan chu an match khelh apianga hnehna chang thei an awm vang a ni. Kan match hnuhnung 10-ah vawi riat hnehna kan chang thei a, Liverpool nen kan inhnehtawk bakah West Ham kan hneh lo, a bak zawngah kan chak vek, hetiang chiah hian match 10 dang khel leh dawn pawh ni ila ka duh reng," tiin a sawi. Chelsea record hi a chhe lo hle, mah se anni aia che ṭha City an awm avangin an phu tawk angin fak an hlawh tawk lo mai chauh a ni.
Italian manager Conte-a'n striker Alvaro Morata leh Michy Batshuayi te bench-ah dahin Eden Hazard, Cesc Fabregas leh Pedro hmangin goal an nawr a, Barcelona forward hlui Pedro hian goal ban a pet per bakah Arsenal captain hlui Fabregas chu Saints tlarhnung chhaih buaitu pawimawh a ni bawk.
Inkhel thunun tak chungin Chelsea hian goal an nei thei mai lo, chawlhlawk hma chiahin Alonso chuan freekick aṭangin Saints goalkeeper Fraser Forste dan theih loh turin a chhuih lut a, goal dang a lut zui lo–Chelsea chak nan a tawk.
Ozil-a goal
Minute 23-naah Arsenal tan Ozil chuan Newcastle defender ball tauh chhuah chu lei a thlen hmain chiang zetin a hlap lut a, Rafael Benitez-a nauten a chhan letna an neih loh avangin relegation zone-ah an awm ta!
Arsene Wenger-a nauten an match hnuhnung pathumah chak ni hmel an hmu lo a, table-ah pasarihna ni chungin Newcastle an mikhual. Hliam vangin Aaron Ramsey leh Theo Walcott te an chhawr thei lo a, Jack Wilshere chuan a vawi hnih nan inkhel bul a ṭan thung–England international Wilshere hian minute 90 chhung ṭha takin a khel thei.
Gunners manager Wenger chuan, "Ni ruk chhungin match thum kan khel a, chetsual theih tak chu a ni. Newcastle khan tharumin min bei na hle a, goal chhuah loa kan inveng tluan thei kha a lawmawm," tiin a sawi.
Championship aṭanga Premier League inpet kai hlim Newcastle hi an league match hnuhnung pakua aṭangin vawi riat zet an tlawm a, manager Benitez chuan January bazarah player lak an mamawh thu a sawi chhuak.
Magpies manager Benitez chuan, "Ka naute an hah tih ka hria, match a tam a, player inthlak kual theih a pawimawh. January thlaah chuan kan team min ti chak thei tur kan lak belh a pawimawh dawn a ni," a ti. Spanish manager hian a nuaten Arsenal an hmachhawn danah a lawm thu a sawi a, huaisen taka an bei zui a nih chuan hnehna an chan thuai a beisei thu a sawi.