Ruatthara hoin Kerala an chak

18th December, 2017

Indian Super League khelh mekah Lalruatthara hming a langsar zel a, Kerala Blasters defender hi Zirtawpni zana NorthEast United laka 1-0 a hnehna an chan ṭumin Emerging Player of the Match-ah thlan a ni.

Kochi-a mipui 33,868 pungkhawm hmaa goal awmchhun hi 'Kerala Golden Boy' CK Vineeth khung a ni a, NorthEast United goalkeeper TP Rehenesh chu minute 42-naah hnawhchhuah zui a nih bawk avangin player 10-a khel Highlanders-in a chhanletna tur an nei thei lo.

Blasters tan Ruatthara'n inkhel bul a ṭan bakah a vawi khat nan Aizawl FC defender hlui Lalṭhakima chu squad-ah dah a ni a, khelmualah erawh a tlan lut lo.

Manchester United defender hlui Wes Brown-a'n ISL-a a vawi khat nan a hmel a lan bawk a, 4-1-4-1 formation an hmanah hian defensive midfielder anga chhawr niin 'Hero of the Match'-ah thlan zui a ni bawk. Highlanders lamah Mizo hmel hmuh tur a awm lo a, Robert Lalthlamuana, Lalrindika Ralte leh Lalrempuia Fanai ten bench lamah hun an hmang tluan vek.

Inrinni zan ISL inkhelah FC Goa-in hnehna an chang chiang a, an mikhualna ramah Delhi Dynamos chu 5-1 ngawtin an sawp–Goan club tan Ferran Corominas, Manuel Lanzarote, Adrian Colunga leh Manuel Arana ten goal khat ṭheuh an khung a, Pritam Kotal chuan an lamah a ti lut bawk. Delhi tana Kalu Uche goal khung chu mualpho zualpui khuhna chauh a ni tawh.

Bench lama bul ṭan Sena Ralte leh Lallianzuala Chhangte chu second half-ah tlan luhtir ni mah se Mizo tlangval pahnih hian danglamna an thlen thei bik lo a, FC Goa an chak chiang hle.

Mimal Lawmman
Kerala Blasters FC 1–0 NorthEast United
Moment of the Match CK Vineeth, Kerala Blasters
Winning Pass of the Match Rino Anto, Kerala Blasters
Fittest Player Nirmal Chettri, NorthEast United
Emerging Player Lalruatthara, Kerala Blasters
Hero of the Match Wes Brown, Kerala Blasters
Delhi Dynamos 1–5 FC Goa
Moment of the Match Romeo Fernandes, Delhi Dynamos
Winning Pass of the Match Ferran Corominas, FC Goa
Amul Fittest Player Mandar Rao Dessai, FC Goa
Emerging Player Narayan Das, FC Goa
Hero of the Match Manuel Arana, FC Goa