Zaninah World Cup Semifinal ; Argentina vs Croatia

Ennawm ropui ber FIFA World Cup 2022 chuan a vawr tawp a thleng mek, zanin dar 12:30 hian Argentina leh Croatia ten semifinal hmasa zawk an khel dawn - khawvel hmun dangte ang bawkin Mizote pawh TV hmaah kan ṭhu leh fur ngei ang.

Lionel Messi a awm avangin Argentina hian ngaihven an hlawh a, champion beiseina pawh an nei sang. Croatia hian Luka Modric an nei ve tho, ani hi Messi angin a boruak a lian ve chiah lo a ni mai thei, an ram tana a hlutna erawh a nep bik chuang lo.

Semifinal thleng thei chin an nih avangin team ṭha ve ve an ni, world champion vawi nga ni tawh Brazil hneh theitu Croatia tan South American ram dang hneh leh hi a huphurhawm lo mai thei, inkhel a hmuhnawm ngei ngei dawn.

Argentina hi...
Argentina goal nawr chu Messi aṭangin a inṭan leh dawn tih a sawi ngam a, ani thlawp tur hian tlan tam thei Julian Alvarez a lut leh ngei ang. Manchester City striker hian Messi tan hmun siamsak tumin thapui a thawh leh ang - Croatia tan ven tur zawk hriat a har mai thei.

Messi ke aṭanga ball chhuak hrim hrim hi Croatia tan ven a ngai dawn, quarterfinal-a Netherlands an hneh ṭum khan mi pali bawr karah pawh a buai lo tih kan hmu, tharum ngah Croatian defender-te tan inthlahdah zeuh pawh a rem lo ang.

Argentina hian hrem vangin Marcos Acuna leh Gonzalo Montiel te an chhawr thei dawn lo, anni pahnih hi tlarhnung sira awm ve ve an ni. A bik takin Acuna hi rinrawl a ni a, a hmunruak hnawh khah a harsain a rinawm.

Nicolas Otamendi leh Cristian Romero te thlawp turin Lisandro Martinez a luh leh ngei a rinawm a, tlarhnuah player panga tlar loin mi pali a rem leh ta zawk a nih pawhin a mak lo ang, a player neih dan chhutin a rem dan chu a tih danglam ngei a rinawm.

Croatia hi...
Luka Modric leh Ivan Perisic te hi player ṭha bik zinga mi an ni a, Chelsea midfielder Mateo Kovacic hming pawh lam hmaih a thiang lo. Tun World Cup khelh laiah bik erawh wing back Josip Juranovic chu an hmanraw hlauhawm a ni.

Celtic defender Juranovic hian Brazilian forward ṭha Vinicius Junior a veng hneh hle a, hei bakah hian an goal nawrna thapui a ni tel. A tlan chakin ball a cross thei em em a, hei tak hi mual sir lama pan ve tak Argentina tana inven uluk ngaihna tur lai a ni ang.

Netherlands leh Argentina inkhel lai kha Croatia coach Zlatko Dalic-a'n a lo en ngei ang a, chutah chuan South American hi ball kangah an buai tih a hmu ngei ang. A striker palian, 6ft 4in a sang Bruno Petkovic hi danglamna siam thei tur zinga mi a ni dawn.

Croatia hian 2018 World Cup khan final lut turin Denmark leh Russia te penalty shootout hmangin an hneh, kuminah pawh Japan leh Brazil an hneh leh tawh. An team khelh dan phung thlirin extra time an thlir a nih pawhin a mak lo ang.

Luka Modric a inpeih
Croatia captain, an thiampuipa leh hruaitu ropui ni bawk Luka Modric chuan Lionel Messi leh Argentina hmachhawn tur an inpeih thu a sawi a, semifinal chauh ni loin World Cup final an thlen theih ngei a beisei.

Kum 37 mi Modric hi a upa tawh, mahse Brazil lakah khan minute 90 chauh ni loin extra time khel tur pawhin a la tlin zak zak hle a, boruak sang tak kara penalty pet tur pawh khan a zam eih lo - zaninah Croatia tana mi pawimawh bik a ni leh ang.

Real Madrid midfielder Modric chuan, "Argentina hmachhawn ka chak tawh hle. Messi hi an ralthuam hlauhawm ber a ni tih kan hria, ani tum pui chu a awlsam dawn lo, mahse inkhel hautak hmachhawn turin kan inpeih.

"Tlang tur chuan theihtawp chhuah a ngai dawn a, kan ramin football kan khelh tawh zinga a ṭha bera kan khelh chhuah a ngai dawn, final kan thlen theih ngei pawh ka ring, chumi tur chuan kan bei dawn.

"Croatia national team hian Real Madrid rilru puthmang ang kan nei, chu chu a tawp thlengin kan beidawng ve ngai lo," tiin a naute a ringtawk a, amah ber hian club tan hlawhtlinna tam tak a chang tawh a, an ram tana nomawi chawi chu a duhthusam a ni bawk ang.

Messi chauh ven ngai a ni bik lo - Croatia Striker
Croatia striker Bruno Petkovic chuan Lionel Messi chauh ni loin Argentina team pumpui hmachhawn tur an ni tih a sawi a, mimal ni loin team veng tura an inbuatsaih thu a sawi chhuak.

Petkovic chuan, "Messi dang turin a hranpa a ruahmanna kan nei hran lo, mimal chauh ni loin Argentina dan kan tum dawn a ni. Argentina hian Messi chauh ni loin player ṭha tam tak an nei, chuvangin an zavaia kan ven a ngai," tiin a sawi.

Dinamo Zagreb striker Petkovic hian quarterfinal-a Brazil an hneh theih nan goal pawimawh a khung, extra time an khelh laiin world champion vawi nga ni tawh lakah si phurh a sut a nih kha, zaninah pawh ani hi La Albiceleste tan ven a ngai ang.

Kan nawr dawn - Argentina Coach
Argentina coach Lionel Scaloni chuan an ram football khelh thiam dan ber chu 'attack' a nih thu a sawi a, an thiam dan tak hian Croatia lakah pawh an khel leh dawn tih a sawi.

Scaloni chuan, "Netherlands nena kan inkhel kha in hria ang, goal hnih kan khung hnuah pawh khung belh tumin kan la nawr reng, a tawp thlengin keini chuan goal khung tumin kan bei ṭhin.

"Kan khingpui ten engtiangin nge an rawn khelh dawn tih ai chuan, kan team hian eng anga ṭhain nge kan khelh chhuah theih ang tih chu a pawimawh ber lai zawk chu a ni. Inkhel awlsam chu a ni dawn lo, mahse theihtawp kan chhuah ang," tiin a sawi.

Argentina coach Scaloni hi kum 44 mi chauh a la ni a, team enkawl lamah tawnhriat a la ngah hran lo. Club lamah phei chuan Sevilla tan assistant coach hna a thawk ve tawh a, chu bak sawi tur a nei lo - an ram team lamah erawh sawi tur a nei thung.

Ram team tan assistant coach a ni tawh a, coach lailawk a nih hnuah 2018 khan a nghet. Hun rei tak hnuah Argentina chu Copa America champion a nih pui thei a, tunah hian 1986 hnua a vawi khat nan World Cup nomawi a beiseipui leh mek.