Mbappe el theitu Giroud leh Messi

2022 FIFA World Cup chu November 20 aṭang khan khelh ṭan a ni a, match 60 khelh tawh aṭangin goal 158 a lut tawh. Match tina 2.63 goal lut zel ang a ni a, tun dinhmuna goal khung tam ber chu Kylian Mbappe niin goal nga a khung tawh.

Tunah hian team pali chiah an dam tawh a, pathumna an zawn dawn avangin team tinin match hnih ṭheuh khelh tur an la nei. Hemi a nih avang hian Golden Boot dawng thei tur a la chiang lo a, Mbappe hnuaia awm Olivier Giroud leh Lionel Messi ten goal li ve ve an khung.

Mbappe Vs Messi
Golden Boot hi mi pakhat chiahin an dawng thei a, goal khung zat a inang a nih chuan a dawng thei tur thliar nan tehfung a awm. Goal khung zat hi a inang a nih chuan an ṭhiante goal khung tur an siamsak zat (assist) en leh tur a ni a, an assist neih zat hi a la inang cheu chuan minute khelh zat en leh tur a ni.

Mbappe hian goal nga a khung tawh bakah assist vawi hnih a nei a, group match hnuhnung bera Tunisia an hneh loh ṭumin bench-ah a awm avangin minute 387 chiah a la khel. Hemi a nih avang hian a hnuai chiaha awm Lionel Messi hian goal khung pawh ni se assist vawi hnih ve ve an neih avangin French forward Mbappe hi a dinhmun a ṭha zawk dawn.

Chutihrualin Messi hi penalty pettu a ni a, tun inelnaa goal li zinga goal hnih hi penalty a nih avangin Argentina captain tan match hnih khelh hmabaka goal hnih khung belh hi thil theih a ni. Golden Boot dawng tur inchuhna hi PSG forward pahnih Mbappe leh Messi ten an inchuh tihin a sawi theih.

Giroud a tel
France player pawimawh zingah Olivier Giroud hming a ri tam tawk lo a, mahse AC Milan striker Giroud hi Les Bleus tan a pawimawh a ni ringawt lo - France tana goal khung tam ber a ni.

Giroud hian November 11, 2011 aṭangin France tan khel ṭanin goal 53 a khung tawh a, Thierry Henry record goal 51 chu tun ṭum inelnaah hian a khum. Arsenal leh Chelsea striker hlui Giroud hnuaiah hian Antoine Griezmann (42), Michel Platini (41), Karim Benzema (37), David Trezeguet (34) leh Kylian Mbappe (33) te an awm.

Tuna la khel lai zinga goal khung tam Griezmann leh Benzema te hi a uai thla lam an nih tawh avangin Giroud record hi khum a har tawh ang. Chutihrualin ram tana goal 33 khung tawhtu Mbappe hi kum 23 chauh a la ni a, hliam pui a tuar a nih ngawt loh chuan Giroud hi a la khum ngei ang.

Chutihrualin FIFA World Cup 2022 bikah erawh Giroud hi goal khung tam zawk a la ni thei a, AC Milan striker hi Benzema awm loh avangin Didier Deschamps-a'n rinrawlah a hmang a, goal a khung belh a la rinawm hle. Golden Boot dawng thei tur inchuhna hi Mbappe leh Messi te inkar chauh ni loin Giroud pawh a la tel chiang a ni.